Libagojele abebekhwabanisa ngezincwadi zokushayela
File photo: Reuters Balinde ukugwetshwa abalahlwe elokukhwabanisa ngamalayisensi okushayela
Image: Sigciniwe
I-Road Traffic Management Corporation (RTMC) iyakwemukela ukugwetshwa komhloli waKwaZulu-Natal wamalayisensi okushayela kanye nothisha wesikole sokushayela ecaleni elichazwa njengokwephulwa kobuqotho emkhakheni wokukhishwa kwamalayisensi okushayela.
Ngomhla ka-8 Julayi 2025, iNkantolo yoBugebengu eThekwini ithole uMnuz Sandile Ndlovu, umhloli waseMooi River, enecala lokukhwabanisa nelokwakha itulo lenkohlakalo ngemuva kokuba kutholakale ukuthi wayekhiphe ilayisensi yomfundi ngomgunyathi kumuntu owayengalubhalanga uvivinyo oludingekayo.
UNdlovu waboshwa ngo-2016 kulandela izikhalo ezatholwa yiNational Traffic Anti-Corruption Unit (NTACU), ophikweni lweRTMC. Lolu phiko lusebenzisana nophiko lwezobunhloli KwaZulu-Natal KwaZulu-Natal kanye nophiko olulwa nenkohlakalo iDirectorate for Priority Crime Investigation (Hawks) ukuze kuphenywe ngalezi zikhalo.
Kutholakale ukuthi uNdlovu wakha itulo noNksz Zandile Dlamini, ofundisa ukushayela, ukuze akhiphe ilayisensi yokufundela ukushayela kwakhokhwa imali engu-R3000. UNksz Dlamini naye ulahlwe yicala ngeqhaza lakhe lokugqugquzela ukungaziphathi kahle ngokwamukela umhlomulo ongekho emthethweni ngaleli cala.
Icala lihlehliselwe ka29 Agasti 2025 ukuze kwenziwe izendlalelo zesigwebo. Ngaleso sikhathi, uMbuso kulindeleke ukuthi ubize ofakazi abengeziwe ukuze bagqamise umthelela walezi zinyathelo ekuphepheni emgwaqeni nasezinsizeni zomphakathi ezibanzi.