Kwengezwe amacala athweswe uZandile Gumede

USENGUMSOLWA wokuqala futhi wengezelwa uhlu lwamacala athweswe wona owayeyimeya yeTheku, uNkk Zandile Gumede.

Ubevele eNkantolo eNkulu eThekwini, izolo nabanye abangu-21 athweswe nabo icala lenkohlakalo nokukhwatshaniswa kwethenda kadoti eyabiza uR430 million.

Phambilini uNkk Gumede wayengumsolwa wesi-16 kuleli cala.

Umbuso wengeze icala lokushintshana ngemali ngendlela engekho emthethweni.

Lokhu kwenyuse nomqingo wamaphepha enkantolo anohlu lwamacala athweswe abasolwa waba u-397 esuka ku-324.

Angaphezu kuka-2 793 amacala abhekene nabasolwa.

UNkk Gumede usengumsolwa wokuqala, alandelwe yikhansela uMnuz Mondli Mthembu owayengusihlalo wekomiti lezokuHlaliswa kwaBantu neNgqalasizinda bese kuba yimenenja kaMasipala weTheku, uMnuz Sipho Nzuza, osahlabe ikhefu emsebenzini.

UMbuso usola laba abathathu noMnuz Robbert Abbu owayeyiphini lenhloko kwaDurban Solid Waste, uMnuz Sandile Ngcobo, owayeyiphini lenhloko kwaSupply Chain Management ngokuba ongqondongqondo abakhwabanisa kule thenda.

UNkk Natasha Kara, ongumkhulumeli weNational Prosecuting Authority (NPA), uthe abasolwa bavele okokuqala kule nkantolo izolo banikwa uhlu lwamacala olubuyekeziwe.

Uthe kube nokushintshwa kwabameli okube khona nokwenze kwahlehliselwa uNovemba 30 icala.

U-Advocate Jay Naidoo ongummeli kaNkk Gumede ophinde ahole ithimba labameli babamangalelwa, uthe selubekiwe usuku lokuqulwa kwecala futhi umbuso wengeze icala lokushintshana ngemali ngendlela engekho emthethweni.

UNaidoo usamile ekutheni uNkk Gumede umsulwa futhi bazokuvezela inkantolo lokhu.

“Ngizofaka isicelo sokuhlinzekwa ngemininingwane yecala ngo-Agasti 15, bese umbuso uyaphendula ngo-Okthoba 15. Kuyobe sekubuyelwa enkantolo ngoNovemba 30 okuyiyona ezonquma usuku esoqala ngalo icala,” kusho uNaidoo.

Abanye abasolwa ngokulandelana kwabo oMnuz Mthokozisi Nojiyela, Sduduzo Khuzwayo, Bhekokwakhe Phewa, Nkk Bagcinile Nzuza (inkosikazi kaNzuza), Mnuz Hlenga Sibisi, uMnuz Mzwandile F. Dludla, inkampani Ilanga laMahlase PTY (LTD), uMnuz Zithulele Mkhize, inkampani Uzuzinekele Trading 31 CC, uMnuz Bongani P Dlomo, uNkk Khoboso Dlomo, inkampani i-Omphile Thabang Projects, uMnuz Craig Ponnan, uMnuz Prabagaran Pariah, inkampani i-El Shaddai Holdings Group CC, uNkk Sithamone Ponnan bese kuba inkampani Umvuyo Holdings CC.

Umbuso uzobiza ofakazi abangu-55 kuleli cala okukhona kubo nabayizikhulu zikaMasipala weTheku.