ISIKHUNGO esibhekelele izifo ezithathelanayo kuleli, iNational Institute for Communicable Diseases (NICD), sithi ukutheleleka kwabantu ngeCovid-19 sekwehlele ku-7%.
Lesi sikhungo sithi izibalo zakamuva zabaqwe yileli gciwane zikhomba ukuthi abantu abasha abahaqwe yileli gciwane bangu-1 504, okuholele ekutheni abahaqwe yiCorona eNingizimu Afrika babe ngu-2 884 134. Abasha ababulewe yileli gciwane bangu-42 osekuholele ekutheni babe ngu-86 216 asebebulewe yilona kuleli.
UNkk Snenhlanhla Jimoh okhulumela lesi sikhungo, uthe zibonakala zehla izibalo zabatheleleka ngeCovid-19 nsukuzonke, nezinga lokutheleleka nalo lehlile.
Uthe kulezi zibalo, abantu abaningi abahaqwe yiCovid-19 ngabaKwaZulu-Natal abangu-391, (26%) kulandele iNorthern Cape enabantu abangu-338, (22%) abahaqekile. E-Free State bangu-14% abantu abasha bakhona abahaqekile; e-Eastern Cape bangu-12%; eWestern Cape bangu-10%; eGauteng bangu-8%; eNorth West bangu-4%; eMpumalanga bangu-3% bese kuthi eLimpopo babe ngu-1%.
Abantu abangeniswe ezibhedlela emahoreni angu-24 bangu-112 okuholele ekutheni abalaliswe ezibhedlela kuleli babe ngu-8 474.