Kuzophenywa nabanye ojele kwele-video yocansi
Okhulumela umnyango wezokuHlunyeleliswa kweziMilo kuleli, uMnuz Singabakho Nxumalo, uthe miningi imibuzo abanayo ngalesi sigameko njengoba umsebenzi wabo nesiboshwa, bebonakala bezijabulisa egumbuni okukhomba ukuthi liyihhovisi.
KUZOPHENYWA nabanye abasebenzi boMnyango wezokuHlunyeleliswa kweziMilo mayelana nevideo esabalale ngoLwesibili, okubonakala kuyo ujele nesiboshwa ebesigcinwe ejele laseNcome, bezitika ngocansi.
Okhulumela umnyango kuleli, uMnuz Singabakho Nxumalo, uthe miningi imibuzo abanayo ngalesi sigameko njengoba umsebenzi wabo nesiboshwa, bebonakala bezijabulisa egumbuni okukhomba ukuthi liyihhovisi.
“Njengoba umnyango umatasa nophenyo, kuzobhekwa ukuthi abekho yini abanye abasebenzi abathintekayo kulesi sigameko. Kumele bacacise abasebenza ehhovisi ebelinojele nesiboshwa ukuthi laba bobabili bangene kanjani kulo. Bayithathe kubani imvume yokulisebenzisa? kubeka yena.
Uthe uma sekuphothulwe uphenyo, umnyango uzothatha isinqumo mayelana nokuqondiswa ubugwegwe kujele okule- video.
“ Uma silandelela, ivideo iqoshwe ngo-Agasti njengoba isabalala manje ezinkundleni zokuxhumana. Isiboshwa esibonakala kuyo kudala sasuka ejele laseNcome. Siphume kuleli jele sayogcinwa kwelinye nezinye iziboshwa ngenxa yenkinga yokushoda kwamanzi ebikhungethe iNcome. Umnyango waphoqeleka ukuthi kube neziboshwa eziya kwelinye ijele ukuze kuncishiswe isibalo seziboshwa,” kuchaza uNxumalo.
Sekusatshalaliswe nezithombe zomshado, okuthiwa ngezikajele nesiboshwa. Kulezi zithombe kubonakala sengathi kwakuwusuku lomshado wabo njengoba behlobe ngezimpahla ezigqokwa uma kuboshwa ifindo likasofasilahlane.