KUZOCACA ukuthi wubani ozonqoba embangweni wokuhola isifunda se-ANC esingesesibili ngobukhulu KwaZulu-Natal, iMusa Dladla.
I-ANC inengqungquthela yezinsuku ezimbili yokukhetha ubuholi obusha beMusa Dladla, eMtubatuba.
Ushisa phansi umbango wokuhola isifunda njengoba kuvela amagama amathathu.
Emagameni kuvela elobengusihlalo we-ANC khona esifundeni, uMnuz Mdu Mhlongo, kuvele elobeyiphini lakhe, uNkk Thembeka Mchunu nelikaMnuz Musa Cebekhulu.
Imithombo yangaphakathi kwi-ANC ithe kungenzeka kugcine kusale amagama amabili emjahweni.
Umthombo ongaphakathi esifundeni uthe maningi amathuba okuthi abeseka uNkk Mchunu bazogcina behlangane nabeseka uCebekhulu.
“Kunezingxoxo eziqhubekayo. Maningi amathuba okuthi lezi zinhlangothi zifinyelele esivumelwaneni sokusebenzisana.’’
IMusa Dladla isele ngemumva ekuhlanganiseni ingqungquthela yokukhetha ubuholi njengoba kuyiyo neNkosi Bhambatha kuphela KwaZulu-Natal ebezingakabi nezingqungquthela zokukhetha ubuholi.
Ubuholi baso bahlakazwa ngasekuqaleni kwalo nyaka ngenxa yokuphelelwa yisikhathi.
Ingqungquthela ibibanjezelwe yimibango yangaphakathi nokwahluleka ukuba nemihlangano yamagatsha eyanele ukuthi kuyiwe engqungqutheleni.
Okhulumela i-ANC KwaZulu-Natal, uMnuz Nhlakanipho Ntombela, uthe bagcine bekwazile ukuxazulula zonke izikhalo, baphinde bakwazi ukuba nemihlangano yamagatsha eyisibalo esanele ukuthi kuyiwe engqungqutheleni.
“Sithanda ukubonga indlela amalungu enhlangano aziphathe ngayo ngesikhathi kuqhubeka imihlangano yamagatsha.”
UNtombela uthe ingqungquthela izobanikeza ithuba lokuthi bazinuke amakhwapha beyinhlangano.
I-ANC ayizange yenze kahle ngesikhathi kunokhetho lohulumeni basekhaya esifundeni njengoba ingazange inqobe ngisho umasipala owodwa.
Ngaphambi kokhetho lwangonyaka owedlule ibiphethe uMasipala wesifunda iKing Cetshwayo, uMhlathuze, uMlalazi neMfolozi.
Bonke labo masipala sebephethwe yi-IFP.
“Ingqungquthela iphinde inikeze izithunywa ithuba lokuthi zinqume ukuthi ubuholi obukhona buyabuyiselwa noma kukhethwa obusha. Lokhu kuzokwenzeka emva kokuthi ubuholi obebukhona sebethule umbiko wabakwenzile ngesikhathi bephethe.”
Ingqungquthela yokukhetha ubuholi esifundeni iNkosi Bhambatha kulindeleke ukuthi ibe ngesonto elizayo, ngaphambi kokuthi kwengqungquthela yokukhetha ubuholi besifundazwe ngoJulayi.