Kuzokhangiswa izikhala eziwu-20 zodokotela eKZN
ODOKOTELA abangasebenzi abaqhinqe eMgungundlovu
Image: Sabelo Nsele
UMPHATHISWA wezeMpilo KwaZulu-Natal, uNksz Nomagugu Simelane, useveze ukuthi kuzokhangiswa izikhala zodokotela eziwu-20, ezinsukwini eziyisikhombisa ukuzama ukwehlisa isibalo sodokotela abangasebenzi esifundazweni.
Lokhu kulandela ukuqhinqa kodokotela kuleli sonto bekhala ngokungaqashwa nokungakhangiswa kwezikhala zodokotela okwamenyezelwa ukuthi zizokhishwa kuzwelonke. Zibalelwa ku-1 200, izikhala zodokotela kanjalo nabanye abasebenzi bezempilo kuleli okwathiwa zizokhangiswa.
Ekhuluma nodokotela abaqhinqe eMgungundlovu, izolo, ehambisana noNdunankulu uMnuz Thami Ntuli neKhabhinethi yesifundazwe, uNksz Simelane uthe odokotela baseKZN bazohlomula ezikhaleni okwamenyezelwa ukuthi zizokhishwa.
Uthe uNgqongqoshe wezeziMali kuzwelonke wamemezela ukuthi zingu-800 izikhala zodokotela ezweni lonke ezizokhangiswa.
"Sifuna ukukucasisa ukuthi lolu hlelo lwezikhala ezingu-800, lusingethwe nguMnyango kazwelonke wezeziMali, owezeMpilo kanjalo nePhalamende. Uma sesazi ukuthi zingaki izikhala esizokwabelwa zona siyisifundazwe, sizobe sesizikhangisa," usho kanje.
Uthe abayizibile indaba yodokotela abangasebenzi.
"Lolu daba lwayiswa ngisho kumengameli wezwe lusuka kuNtuli. Yingakho kunohlelo lukazwelonke lokuqasha odokotela."
Uthe eminyakeni emihlanu edlule balahlekelwe wu-R14 billion bengumnyango ngenxa yokunqanyulwa kwesabelomali.
Unxuse ukuthi kube nokubekezela.