KUZOGUGA iphakethe kwabazohambela i-gala dinner ye-ANC ezobanjwa ngaphambi kombhiyozo weJanuwari 8.
Amathikithi okungena kulo mcimbi owandulela umgubho weminyaka engu-110 kwasungulwa i-ANC, amba eqolo.
Kukhona ngisho amathikithi abiza ngaphezu kukaR1 million.
Le mininingwane iqukethwe kwi-website yenkampani edayisa amathikithi, i-ticketpro.
Lo mcimbi ovamise ukuhanjelwa ngomacaphuna kusale uzobanjelwa ehhotela eliphambili, edolobheni iPolokwane.
Ithikithi elibiza kunawo wonke libiza uR1, 2 million.
Abazothenga la mathikithi bazokuba nenhlanhla yokuhlala eduze kukaMengameli wale nhlangano, uMnuz Cyril Ramaphosa.
Kuleli tafula kuzokuba nezihlalo eziyisithupha kepha kungengezwa ezine uma kunesidingo.
Labo abafuna ukuhlala kwePhini likaMengameli wale nhlangano, uMnuz David Mabuza, kuzofanele balungise uR1 million.
Nakulona leli tafula kuzokube kubekwe izihlalo eziyisithupha kepha nazo zingengezwa ngezine uma kunesidingo.
Abazohlala eduze kwabaholi bale nhlangano okungusihlalo kazwelonke, uMnuz Gwede Mantashe, uMgcinimafa, uMnuz Paul Mashatile, noSekela Nobhala Jikelele, uNkk Jessie Duarte, bona bazokhokha uR95 000.
Abafuna ukuhlala eduze kongqongqoshe bakazwelonke noma eduze nondunankulu bezifundazwe, bona bazokhokha uR35 000.
Ithikithi elishibhe ukunawo wonke lona libiza uR5 000.
Ukumba eqolo kwala mathikithi kushiye abantu abaningi bebambe ongezansi ezinkundleni zokuxhumana.
Abaningi benze izinsolo zokuthi i-ANC iphezu kwamaqhinga okuzitakula obishini lwezezimali.
Le nhlangano icwile obishini lwezikweletu njengoba ihluleke izikhawu eziningi kulo nyaka ukukhokhela abasebenzi bayo ngesikhathi.
Imizamo yokuthola ukuphawula kokhulumela i-ANC, uMnuz Pule Mabe, ayizange iphumelele.
Ngesikhathi eshayelwa, ucele ukuba abuye ashayelwe emva kwemizuzu eyishumi.
Ngesikhathi eseshayelwa, akabange esalubamba ucingo.