NGEKE zivuselelwe izinkontileka zentsha ebisiza ezikoleni ezingaphezu kuka-20 000 kuleli.Intsha ebiqashwe ngaphansi komkhankaso kaMengameli Cyril Ramaphosa wokwakha amathuba omsebenzi, iqale ukusebenza ngo-Ephreli kulo nyaka.
Okhulumela uMnyango weMfundo eyisiSekelo uMnuz Elijah Mhlanga, uthe izinkontileka eziphela ekupheleni kwale nyanga ngeke zivuselelwe. Uthe kumanje kunezinhlelo abaphezu kwazo zokuthi kwamukelwe enye intsha ezoqala ngonyaka ozayo.
“Iqoqo lesithathu leli elizophelelwa izinkontileka. Iqoqo lesine sisezinhlelweni zokuthi silithathe ukuze liqale ekuqaleni konyaka ozayo.”
Uthe intsha isitholile isipiliyoni ezikoleni ezehlukene.
“Siyayinxusa intsha ukuthi iqhubeke nokungaziyeki izinhlelo ezizokwenza ukuthi ithole amakhono. Sinxusa nezinhlaka ezehlukene ukuthi zinike intsha amathuba okuthola amakhono.”
Uthe uNgqongqoshe wezeMfundo, uNkk Angie Motshekga, nabasezifundazweni babonga abaphezi ngomsebenzi owenziwe abebesiza ezikoleni.
“Enye intsha ehlomule kulolu hlelo sithole ukuthi isizivulele amakilasi okusiza ozakwabo. Bafundisa izifundo abenza kahle kuzona ezikoleni. Enye yenza imisebenzi yokuphucula ingqalasizinda emiphakathini ehlukene.”
Uthe nomengameli ulibonge kakhulu iqhaza lentsha lokusiza ezikoleni. Lolu hlelo lwabelwa ngaphezu kukaR6 billion ukuze intsha ithole amakhono.
Intsha eyamukelwa ohlelweni eneminyaka ephakathi kuka-18 no-35.
Ingaphezu kuka-250 000 intsha esihlomule ngamathuba ngaphansi kwalo. Ukuze uhlomule kulona kumele uhlale eduzane nesikole, kube umuntu ongasebenzi, ungatholi isibonelelo sikahulumeni noma umfundaze weNSFAS kanjalo nowokufundiswa iFunza Lushaka.
Akumele uthole isibonelelo sabangatohozi noma kube ngukuthi uke walahlwa amacala phambilini.
Akumele futhi kube ngukuthi uke wangaziphatha kahle ngesikhathi seqoqo lokuqala, elesibili noma kwelesithathu.