Kuxwayiswa kakhulu abasogwini ngesimo sezulu esingesihle
Kubikwa umoya onamadla namagagasi anolaka okungaphazamisa izintambo zikagesi, izikebhe nabasondelene nolwandle
Image: Armand Hough/Independent Newspapers
Isikhungo sokulawulwa kwezinhlekelele KwaZulu-Natal siqaphe ngeso lokhozi isimo sezulu esingesihle esithinta izingxenye eziningi zesifundazwe.
UMfundisi Thulasizwe Buthelezi, ongumphathiswa wezokuBusa ngokuBambisana neziNdaba zoMdabu, unxuse izakhamizi ukuthi ziqaphele njengoba lezi zimo zibeka engcupheni impilo yabantu. I-South African Weather Service isikhiphe isexwayiso sesigaba 4 mayelana nomoya olimazayo namagagasi ayingozi, okulindeleke ukuthi abe phakathi kwamamitha angu-4.5 no-6.0 KwaZulu-Natal.
Izindawo ezithintekayo kubalwa iBig Five Hlabisa, eThekwini, KwaDukuza, Mandeni, Mfolozi, Ray Nkonyeni, Umdoni, noMlalazi.
Kulindeleke ukuthi kube nomoya olimazayo phakathi kwePort Edward neKosi Bay kusukela ngoLwesibili ekuseni kuze kube uLwesithathu kusihlwa, okungadala ukunqwabelana kwesihlabathi emizileni yasogwini, kuphazamise amachweba namachweba amancane, ukuba sengcupheni kokunqamuka kwezintambo zemikhumbi ezincane nemikhulu. Kubhekwe umonakalo ongaba khona ezintanjeni zikagesi, ukuwa kwezihlahla.
Kunxuswa izakhamuzi kanye nabadebenza olwandle ukuthi bagweme imisebenzi yasogwini kanye nokuba sogwini ngalesi sikhathi. Abanezikebhe ezincane kuya kweziphakathi kufanele bafune indawo yokuzikhoselisa.