KUTHOLWE izinsalela zesidumbu sowesilisa ongaziwa nokusolwa ukuthi sasiboshwe ngozankosi ngenkathi sithungelwa ngomlilo e-Eastbury Drive, ePhoenix, ngoLwesithathu ekuseni.
Onogada beReaction Unit South Africa ( RUSA), kuthiwa baphuthume endaweni yesigameko ngabo-10 ekuseni ngemuva kokuthola umbiko ngalesi sidumbu.
UMnuz Prem Balram, uthe ithimba labo lifice lesi sidumbu esishisiwe kunamathayi emoto amabili abeseduze kwaso.
“Umufi bekunezinkomba zokuthi uboshwe ngozankosi wabe eseshiswa ngamathayi aficwe yithimba lethu ebekwe phezu kwemilenze yakhe. Isidumbu sikamufi obengasabonakali nhlobo ngenxa yokusha, besinezingcingo nebezikhomba ukuthi ziphume emathayini asetshenziswe ngenkathi sishiswa,” kubeka uBalram.
Okhulumela amaphoyisa KwaZulu-Natal, uColonel Thembeka Mbele, usiqinisekisile isigameko sokutholakala kwesidumbu.
“Amaphoyisa asematasa endaweni yesigameko njengamanje,” kuphetha uCol Mbele.