UGCINE umisiwe umhlangano wokukhetha imeya entsha yoMasipala weTheku izolo, kulandela izinxushunxushu nokunqamuka kukagesi kungakavunyelwana.
Okhulumela umasipala, uMnuz Msawakhe Mayisela, uthe yize bezamile ukulungisa ugesi ukuze kuqhutshekwe, lo mhlangano uphinde waphazanyiswa yidlanzana labathile.
Uthe umasipala uyaphenya mayelana nokuthi ezokuphepha ziphazanyiswe kanjani?
Uthe uSomlomo omusha, uThabani Nyawose, uzoqhubeka nomhlangano uma isimo sesivuma.
Kusuke uthuthuva kutholana phezulu amaqembu ezepolitiki.
Amakhansela amaqembu ezepolitiki ahlukene kulo mkhandlu abambane ngezihluthu emhlanganweni womkhandlu, nokubambezele ukuqhubeka kwalo mhlangano obuyizolo.
Umsindo uqubuke emva kokukhethwa kokasomlomo womkhandlu.
Kulesi sikhundla kukhethweogaqele isikhundla sokuhola i-ANC kwisifunda eThekwini uMnuz Thabani Nyawose.
Uhlule uMnuz Thabani Mthethwa weDA, noMnuz Philani Mavundla we-ActionSA kulo mbango.
Emva kokumenyezelwa kwemiphumela yokukhethwa kukaNyawose, kube sekuqubuka umsindo.
Amaqembu ezepolitiki amancane ayiphonsele inselelo imiphumela.
Akhale ngokuthi isibalo samakhansela abekulo mhlangano asihambisani nesamakhansela avotile.
La maqembu abefuna kuqalwe phansi ukuvota.
Lo mdonsiswano uholele ekutheni kubambezeleke ukuqhubeka komhlangano ovele wangalawuleka izikhawu eziningi njengoba amakhansela abejikijelana ngamazwi.
Emva kwalo mdonsiswano umhlangano ubuye wabanjezelwa amaqembu ezepolitiki ehlukene acele ukunikezwa ithuba lokuyobamba inguyazana.
Kuke kwaba nesikhawu lapho kuhambe ugesi ngesikhathi kusaqhubeka umhlangano.
Amakhansela e-ANC ake aphakamisa nokuthi uhlehliswe umhlangano wayizolo, ekhala ngokuthi impilo yawo isengcupheni ngenxa yomoya obuvunguza ngamandla etendeni ebekubanjelwe kulo umhlangano.
Alikho iqembu elinqobe ngamalengiso kulo mkhandlu.
I-ANC ibizimisele ngokuphakamisa uMnuz Mxolisi Kaunda, ukuba aphinde athathe isikhundla.
Kuvela ukuthi amaqembu amancane wona abefuna isikhundla sithathwe ikhansela leDA, uNksz Nicole Graham.
Kulo mhlangano kuphinde kwahlala obala ukungahoshelani phakathi kwe-IFP ne-ANC.
Yize i-IFP yamemezela isivumelwano esiphakathi kwayo ne-ANC ngokuphathwa komasipala baKwaZulu-Natal okungekho iqembu elinqobe ngamalengiso kubona, kepha izolo i-IFP ibibhekene ngeziqu zamehlo ne-ANC.
Amakhansela aleli qembu akubeke kwacaca ukuthi afuna ukuyibona iphumile i-ANC emandleni kulo mkhandlu.
Ikhansela le-IFP, uMnuz Gwala, lizwakalee lithi akubizwe i-ambhulensi.
Ibukeka yehlulekile imizamo yokungenela kwabaholi balezi zinhlangano kulo mbango.
Usihlalo we-ANC KwaZulu-Natal, uMnuz Sihle Zikalala, ubonakale exoxa nosihlalo we-IFP kulesi sifundazwe, uMnuz Thami Ntuli.
Kepha izingxoxo zabo zibonakala zingazange zithele zithelo.
Nakweminye imihlangano yemikhandlu yokukhetha izimeya ezintsha KwaZulu-Natal ebiyizolo i-ANC ihlangabezane nembibizane.
Le nhlangano ilahlekelwe imikhandlu efana neNewcastle, noMvoti.
Yonke le mikhandlu ithathwe i-IFP.
UMnuz Xolani Dube ukhethwe njengemeya yaseNewcastle, kwathi uMnuz Malembe wakhethwa njengemeya yaseMvoti.