KUSOLWA ingxabano kumalungu omndeni, kutholakala isidumbu sowesilisa sikhungwe ngebhulukwe silenga esihlahleni, eRedcliffe eVerulam ngoMsombuluko, esigamekweni okusolakala ukuthi esokuzibulala.
Isidumbu sowelisa oneminyaka engu- 33 (esingenalo igama lakhe), kuthiwa sitholwe amalungu omphakathi silenga egatsheni lesihlahla sikamango, abe esebikela abenkampani yonogada i- Reaction Unit of South Africa (RUSA).
Okhulumela inkampani uMnuz Prem Balram, uthe onogada bathole umbiko ngabo- 6 ekuseni banikela endaweni yesigameko.
“Ngokusho kukamfowabo kamufi, baxabane ekuseni ngaphambi kokuthi umufi ahambe. Uthe usabise ngokuzibulala, abakubo bazise umfowabo omdala ngezinsongo zakhe zokuzibulala okuthe uma bemfuna, batshelwa amalungu omphakathi ukuthi isidumbu sakhe sitholakele,” kusho uBalram.
Okhulumela amaphoyisa KwaZulu-Natal uCaptain Nqobile Gwala uthe amaphoyisa aseVerulam avule idokodo lophenyo ngokushona komuntu.