IVENI eliginqike ngaseKimberly ladlula nemphefumulo yabathathu. Isithombe: ER24

KUSHONE abantu abathathu kwalimala abawu-8, okubalwa kubo nezingane, kuginqika iveni ku-N12 ngaseKimberly namhlanje ntambama. 

Abezimo eziphuthumayo be-ER24 babizelwe endaweni yesigameko ngo-1.10 lapho bafike sekukhona amaphoyisa eSAPS. 

Iveni lificwe lihlezi ngesayidi eceleni komgwaqo, abagibeli belele eduzane nalo. 

Ngemuva kokuhlaziya isimo abezimo eziphuthumayo bathole abesifazane ababibili nomfana osemncane sebephangalele. 

“Abanye abawu-8 balashelwe endaweni yesigameko. Owesilisa oyedwa ulimale kanzima kanti ubesesimeni esibucayi,” kusho isitatimende se-ER24. 

Owesilisa obesesimeni esibucayi uhlengwe ngobuchwepheshe be-advanced life support ngaphambi kokuphuthunyiswa esibhedlela. 

Khonamanjalo, usesimeni esibucayi owesilisa oneminyaka ewu-65 owe ebhulohweni wathanqazeka emgwaqeni uN3, e-Ashburton, KwaZulu-Natal ngoLwesithathu ekuseni.  

Abe-ER24 bamufice elimele kanzima emlenzeni, walashelwa emgwaqeni ngaphambi kokudluliselwa eMediclinic, eMgungundlovu.