Kusamile ukufakwa kwezicelo ukulekelela osomabhizinisi

INHLANGANO esiza osomabhizinisi ngoxhaso lwemali iBusiness Partners Limited iveze ukuthi kusamile ukufakwa kwezicelo esikhwameni sikamacaphunakusale uMnuz Johann Rupert esinoR1 billion wokulekela osomabhizinisi abancane.

Lesi sikhwama esibizwa ngeSukuma Relief Programme sithole izicelo zoxhaso lukaR2.8 billion selokhu siqale ukwamukela izicelo zoxhaso kosomabhizinisi abakhahlanyezwe yiCovid-19.

UMqondisi weBusiness Partners, uMnuz Ben Bierman, uthe banikwe uR1 billion ukuthi bawucazele osomabhizinisi abadinga usizo kodwa izicelo abazitholile zifinyelela kuR2.8 billion. Yingakho benqume ukuthi balumise uhlelo lokufakwa kwezicelo.

“Sizocubungula izicelo ezisitholile bese siphendula osomabhizinisi. Uma kuwukuthi kukhona imali esasele ngoba kukhona osomabhizinisi abangaphumelela noma kwenzeka sithola enye imali sizophinde silivule ithuba lokufaka izicelo,” kusho uBierman.

Ukugcizelele ukuthi awekho amakhasimende eBusiness Partners azoxhaswa ngemali yeSukuma Relief ngoba isibalo sezicelo abazitholile sikhombisa ngokusobala ukuthi nabo kufanele balekelele amakhasimende ngemali yabo.

Uveze ukuthi emuva kwezinsuku ezintathu bevule uhlelo lokufaka izicelo kwiSukuma Relief bathola izicelo eziwu-10 000 okusho ukuthi baningi osomabhizinisi abancane abathwele kanzima ngenxa yeCovid-19.

“Sicela izinkampani ezinkulu zilekelele ezincane. Osomabhizinisi abancane bawusizo eNingizimu Afrika. Kubalulekile ukuthi sibanike usizo lwemali njengamanje ngoba babhekene nesimo esinzima,” kusho uBierman.

Kuzokhumbuleka ukuthi i-Economic Freedom Fighters yamgxeka uRupert ngokufaka uR1 billion wokusiza osomabhizinisi owaqale wamenyezelwa njengomnikelo kodwa kwavela ukuthi uyimali ebolekisayo okudingeka ukuthi osomabhizinisi bayikhokhe ngokuhamba kwesikhathi.