Sabelo Nsele
IGCINE ikhethiwe iMeya yomkhandlu waKwaDukuza obese kuphele unyaka umasipala ungenayo imeya.
Kuqokwe uNkk Dolly Govender ukuthi avale isikhala esavuleka ngokushona kukaMnuz Ricardo Mthembu owashona ngo-2019.
UMthembu, odlule emhlabeni kulo nyaka ehaqwa yigciwane iCorona, washiya isikhundla sobumeya ngemva kokukhethwa njengelungu lesiShayamthetho saKwaZulu-Natal nyakenye.
Kusukela lapho bekulokhu kubambe yena uNkk Govender ngenxa yoqhekeko emakhanseleni e-ANC mayelana nokuthi ngubani okufanele agaxwe amaketanga obumeya.
Imihlangano eminingi yokukhetha imeya entsha yabhuntsha ngenxa yokuthi iningi lamakhamsela e-ANC ayevele afake izixoliso, abike ukugula.
Kuvela ukuthi amanye amakhansela abefuna kuqokwe uSomlomo womkhandlu, uNkk Phumlile Zulu, njengemeya kanti amanye abefuna uSotswebhu emkhandlwini, uMnuz Dumisani Ndimande ukuba anikwe isikhundla.
UNkk Govender ubesebe yiPhini lemeya amahlandla amabili, kusukela ngo-2011, waphinde wakhethwa nango-2016.
Enkulumeni yokwamukela isikhundla uNkk Govender uthe uzizwa ethobekile ngokuqokwa.
“Mningi umsebenzi ongihlalele njengoba kuzofanele sihambise intuthuko kubantu. Ngokusebenza ngokuzimisela nokubambisana, kuningi esingakwenza.”