KUTHIKAMEZEKE ukusebenza kwe-internet, kungena indathane yezicelo zentsha efuna ukungena esibalweni salabo abazoqeqeshelwa ukuba amaphoyisa eSouth African Police Service (SAPS).
Lokhu kuvezwe amaphoyisa ezingeni likazwelonke kuleli sonto.
Ngokusho kwawo esitatimendeni asifake ezinkundleni zokuxhumana, zingaphezu kuka-67 000 izicelo ezingenile esikhathini esingangamahora angu-24, kuvulwe uhlelo lokuthi zifakwe kusetshenziswa i-internet.
Kungokokuqala amaphoyisa ophiko lweSAPS ekhiphe umyalelo wokuthi kufakwe izicelo kusetshenziswa i-internet.
Phambilini, abafuna ukufaka izicelo bebeye bazihambise eziteshini zamaphoyisa eziseduze.
Lokhu amaphoyisa athe akwenzela ukugwema amaphepha amaningi, ukunqanda ukuphasiswa kwezicelo ngokobungani, ngokobuhlobo, inkohlakalo nokulahleka kwezicelo.
Lolu hlelo lokufakwa kwezicelo luvulwe ngoJuni 30, 2025, kanti luzovalwa ngoJulayi 18, 2025.
Bangu-5 500 abazothathwa bese befakwa ngaphansi kohlelo lokuqeqeshwa okuzothatha izinyanga eziyisishiyagalolunye emakolishi amaphoyisa ehlukene ezweni lonke.
Abaneminyaka engu-18 kuya kwengu-35 bavunyelwe ukuthi bafake izicelo.
Isitatimende sithe abesifazane nabesilisa abanale minyaka, abangakaze balahlwe amacala, bayakhuthazwa ukuba baqhubeke nokufaka izicelo ngokuvakashela i-website ethi erecruitment.saps.gov.za.