Kumosheke uR16 million ngenxa yomshini wezincwadi zokushayela ofa njalo
Kumosheke uR16 million ngenxa yomshini wezincwazi zokushayela ofa njalo
Image: Independent Newspapers Archives
SEKUVELE ukuthi kushaye kwaqeda imali engaphezu kukaR16 million ukulungisa umshini wokugaya izincwadi zokushayela ezweni ohlale ufa njalo. Lokhu kwenza ukuthi kubambezeleke uhlelo lokwenza amakhadi ezincwadi zabashayeli.
Lokho kuvele emva kokuthi uMnyango wezokuThutha ezweni umemezle ekuqaleni kwenyanga edlule ukuthi umshini wokugaya amakhadi ezincwadi zokushayela usuyasebenza, kulandela ukuma nse kokusebenza kwawo ngenxa yokufa ngoFebhuwari 5, okwaholela ekutheni kubambezeleke ukugaya amakhadi ezincwadi zokushayela awu-747 748 kuze kuzoba yimanje.
Ukuzama ukuphuthumisa ukulungisa umonakalo osudalekile, uhlaka lwezincwadi zokushayela eMnyangweni wezokuThutha lwandise amahora okusebenza ezisebenzini zalo.
Lokhu kuvezwe nguNgqongqoshe wezokuThutha uNkk Barbara Creecy, ephendula umbuzo ePhalamende womholi weRise Mzansi, uMnuz Songezo Zibi, obebuze ukuthi kubiza malini ukulungisa lo mshini ofa njalo.
UZibi ubuze nokuthi bangaki abasebenzi ababhekele ukwenza umsebenzi wokugaya amakhadi kulo mshini, nokuthi yimalini esikhokhelwe bona ngokusebenza amahora angaphezu kwajwayelekile.
Yilapho uNkk Creecy edalule khona ukuthi ngoMeyi 15 abelinganiselwa ku-733 000 amakhadi ezincwadi zokushayela angakagaywa, waphiinde waveza ukuthi kuhambe kanjani futhi kwaba namthelela muni ukuphazamiseka kokusebenza kwalo mshini.
Ngonyaka wezimali u-2022/23 ziwu-26 izinsuku ezingasetshenzwanga ngenxa yokufa kwalo mshini, zibe ngu-48 ngo-2023/24, zingu-17 ngo-2024/25 neziwu-38 ngo-2025/26.
Kanti imali esetshenziswe ukulungisa lo mshini ngaleyo minyaka kube wuR9,267,862,33 ngo-2022/23, R1,651,772,57 ngoR2023/24, R544,747,64 ngo-2024/25 noR624,988,10 ngo-2025/26.
Imali esisetshenziswe ukukhokhela amahora angaphezu kwajwayelekile asetshenzwe ngabasebenzi wuR624,988,10 ngo-2022/23, R1,608,102,52 ngo-2023/24, R1,351,473,78 ngo-2024/25, kanti akukakhokhwa mali kunyakamali ka-2025/26.
UNKk Creecy uthe lo mshini usetshenziswa ngabantu abane ngesikhathi esisodwa, nokuthi basohlelweni lokuthi kutholakale umshini omusha wesibili ukusiza ukugwena izimo ezinjena.