Kulaliswe iziguli eziwu-10 700 ezineCovid ezibhedlela zakuleli
ININGIZIMU Afrika isijoyine amanye amazwe ngokuba nesibalo esiphezulu sabalaliswe ezibhedlela ngenxa yokuguliswa yiCovid-19 Isithombe: AP/Frank Franklin II ININGIZIMU Afrika isijoyine amanye amazwe ngokuba nesibalo esiphezulu sabalaliswe ezibhedlela ngenxa yokuguliswa yiCovid-19 Isithombe: AP/Frank Franklin II
ZIWU-10 700 iziguli ezihaqwe yigciwane iCorona ezilaliswe ezibhedlela phakathi kukaMashi noJuni.
UNgqongqoshe wezeMpilo, uDkt Zweli Mkhize, uthe iziguli zilaliswe ezibhedlela eziwu-269 ezifundazweni ezehlukene.
Ziwu-71 izibedlela zikahulumeni neziwu-189 ezizimele.
Uthe iNational Institute of Communicable Diseases (NICD) ibicubungula ulwazi lweziguli ezihaqwe yigciwane ezilaliswe ezikhungweni zezempilo phakathi kukaMashi 5 noJune 21.
I-NICD ithole ukuthi * -5 836 weziguli kweziwu-8 245 zinezinye izifo ezingamahlala khona. U-3 419 (59%) unesifo sokwehla nokwenyuka komfutho wegazi, * -2 813 (48%) unesifo sikashukela, * -1 116 (19%) uneHIV, * -240 unesifo sofuba, * -579 uke zaphathwa yisifo sofuba phambilini.
“U-3 260 weziguli kweziwu-10 700 ezilaliswe ezikhungweni zezempilo ubusesezibhedlela ngesikhathi kwenziwa umbiko. Eziwu-5 925 seziluleme futhi seziphumile ezibhedlela,” kusho uMkhize.
Iziguli eziwu-7 324 ezibulawe yiCovid-19 bekungabantu asebekhulile, amadoda, bezinezifo ezingamahlalakhona okubalwa kuzo ukwehla nokwenyuka komfutho wegazi, isifo sikashukela, isifo senhliziyo, isifo sezinso esingaselapheki, HIV abanye bekhuluphele ngokweqile.
“Uhulumeni uyancoma ukuthi abantu basebenzise izifonyo, baqhelelane. Asebekhulile bazinakekele ngokuthe xaxa. Impilo ephilwa njengamanje kumele siyithathe njengejwayelekile. Kuningi osekwenziwe yiWorld Health Organization (WHO) selokhu kubhedukile iCoronavirus yase yenza ucwaningo. SiyiNingizimu Afrika bekumele nathi senze olwethu ucwaningo sibheke ukuthi sikuphi,” kusho uDkt Mkhize.
UDkt Lungi Nyathi weMedscheme uthe igciwane lingena kubo bonke abantu akukhathalekile ukuthi baneminyaka emingaki.