Kugwazwe kwabulawa ugogo nomzukulu befunwa imali yempesheni
USAKHUNGATHEKILE umndeni kagogo waKwaMangamunde, KwaNongoma okubikwa ukuthi ubulawe nomzukulu wakhe ngabasolwa ababili abahlala endaweni ngeledlule, befuna imali yempesheni.
Kuthiwa umufi (69) ubeyedwa egumbini lokuphumula, umzukulu wakhe oneminyaka emine esegumbini lokulala ngenkathi kungqongqoza abalisa ababili basendaweni abacele ukuvulelwa.
Kubikwa ukuthi ugogo obesaba ukuvula umnyango, ufonele umakhelwane wakhe emazisa ukuthi kunabantu abaphambi komnyango wakwakhe.
Umakhelwane ophuthume emzini kagogo, kubikwa ukuthi ufike kungekho muntu phambi komnyango wabe esebuyela emuva.
Abalisa ababili okusolwa ukuthi bebecashile, baficwe ngumufi abebemlinde egumbini lokuphumula.
Kubikwa ukuthi bamtshele ukuthi bafune imali yempesheni ngodli kuyena.
Kuthe uma enqaba, bamgwaza entanyeni ngommese abebewuphethe.
Izidumbu zabagilwa kuthiwa zihlale endlini kusukela ngoMsombuluko kwaze kwashaya uLwesine zingabonwa wumuntu.
Umsolwa (20) oyedwa okusolwa ukuthi ubedliwa wunembeza, kubikwa ukuthi nguye oqhumbuze ithumbu, wazisa abantu bakubo ngesenzo sabo.
Ugogo kuthiwa uficwe ngomakhelwane edindilizile egumbini lokuphumula, umzukulu elele eduze kwakhe, opha emakhaleni nasezindlebeni.
Umsolwa ( 13) wesibili obesebalekile endaweni, kubikwa ukuthi naye utshele abakubo, base bemuyisa esiteshini samaphoyisa endawo.
Umzukulu kamufi, uNksz Nolwazi Dlamini, uthe namanje basathuthumela ngesehlo esibehlele futhi kusekude ukuthi bakhohlwe yiso.
“ Ukube oyedwa walabafana akazange ashaywe wunembeza ngabe mhlawumbe namanje asikabi nalwazi ngokubulawa kukagogo nengane. Sibuhlungu, kuqaqamba izinhliziyo ngokusehlele,” kuzikhalela uNksz Dlamini.
Eqhuba, uthe ufisa umthetho uthathe indawo yawo ukuze bajeziswe abasolwa.
Okhulumela amaphoyisa KwaZulu-Natal, uColonel Thembeka Mbele…………..
Khonamanjalo, kutholakale izidumbu zabesifazane abathathu nomlisa oyedwa waseMlaza abagcina ukubonaka emngcwabeni eNkandla ngoMgqibelo odlule.
UNksz Zinhle Mkhize (33), Nksz Nonhlanhla Kubheka (30) noMnuz Njabulo Khoza ( 21) obesekuphele isonto bethungathwa amaphoyisa, kubikwa ukuthi izidumbu zabo zitholakale izolo ehlathini laseBabanango.
Okhulumela amaphoyisa, uColonel Thembeka Mbele, uthe : “ Kuphenywa amacala okubulala esiteshini samaphoyisa aseBabanango,” kubeka uCol Mbele.