Kudlule insika yasendlunkulu ebiyeseka iSilo
ISILO uMisuzulu, uNdlunkulu uMavis Zungu Zulu, uNdlunkulu ongasekho, uThoko Ntombela Zulu, uNdlunkulu uSibongile Dlamini Zulu noNdlunkulu waKwaLinduzulu uThandekile Ndlovu Zulu
Image: Umshuthi Oclean Photography
INDLUNKULU kaZulu igubuzelwe yifu elimnyama njengoba kudlule emhlabeni insika eyeseka iSilo uMisuzulu Sinqobile kaZwelithini.
UNdlunkulu uThoko Ntombela Zulu, udlule emhlabeni ngesonto eledlule.
UNdlunkulu wakwaNxangiphilile ungomunye wezingwevu zasendlunkulu ebezilokhu zisemuva kweSilo kusukela sangena esihlalweni.
Ubehlezi ebonakala ehamba noNdlunkulu uMavis Zungu Zulu emihlanganweni yasendlunkulu.
UNdlunkulu ubegane owayeyibamba bukhosi bukaZulu,uMntwana uMcwayizeni kaSolomon.
UMntwana uMcwayizeni waba yibamba bukhosi ngaphambi kokuba kungene esihlalweni iSilo uGoodwill Zwelithini kaBhekuzulu.
UMntwana uMcwayizeni wayeyilungu lePhalamende elimele i-ANC.
Ubuholi be-ANC KwaZulu-Natal nakuzwelonke budlulise amazwi enduduzo ngokuguqa kukaNdlunkulu.
Okhulumela i-ANC KwaZulu-Natal, uMnuz Fanle Sibisi, uthe uNdlunkulu ubambe iqhaza elibalulekile ekukhuthazeni intsha ukuba izigqaje ngobuzwe bayo.
"Ubengakuthandi ukukhuluma kodwa ubekwazi ukufundisa ngendlela yakhe ehlukile. Ubehlezi ekhuthaza intsha ukuba ingakhohlwa lapho iphuma khona, ingawalahli amasiko nokuthi iziqhenye ngobuzwe bayo. Besifunda okuningi kuNdlunkulu."
USibisi uthe akulahlekelwe indlunkulu kaZulu kuphela kodwa wathi isizwe sonke silahlekelwe.
"Simethulela isigqoko njengoba ebehlezi egqugquzela ukuthula. Baningi abantu abafunde lukhulu kuye."
Okhulumela i-ANC kuzwelonke, uNkk Mahlengi Bhengu-Motsiri, uthe uNdlunkulu wakhombisa ubuholi ngesikhathi ema noMntwana uMcwayizeni ngezikhathi ezinzima.
"Ngalesi sikhathi uMntwana kwakufanele abhekane nomsebenzi wasendlunkulu aphinde abhekane nempi yokulwela inkululeko."
UNkk Bhengu-Motsiri uthe ukuguqa kukaNdlunkulu kuthunuka izilonda ezingakapholi.
Imizamo yokuthola ukuphawula kokhulumela iSilo, uMntwana uThulani Zulu, ayizange iphumelele.