Kubuye ithemba emphakathini kwethulwa usonkontileka
UMPHATHISWA uMnuz Sboniso Duma ekakwe yiMeya yaseMgungundlovu uMnuz Mzi Zuma neyaseMshwathi uMnuz Mandla Zondi ezinkundleni zemidlalo zaseMakeni, eMount Elias
Image: SITHUNYELWE
SEKUZOPHELA ukuthelwa yizintuli nodaka emphakathini waku-ward 3 kuMasipala waseMshwathi kulandela ukwethulwa kukasonkontileka ozofaka itiyela emgwaqweni uP278.
Kube yintokozo emphakathni wakulo mkhandlu ngesikhathi uMphathiswa woMnyango wezokuThutha nokuHlaliswa kwaBantu KwaZulu-Natal, uMnuz Siboniso Duma, ezokwethula lolu hlelo ezinkundleni zemidlalo zaseMakeni, eMount Elias ngoLwesibili.
UDuma uthe ngale ngqalasizinda kubekwe eceleni isamba sikaR353 million. Uthe izinkampani ezizinze kuMasipala waseMshwathi nowaseMvoti zizokwabelana ngesamba sikaR79.3 million.
"Izinkampani eziphethwe ngabesifazane zizothola uR23.8 million, eziphethwe yintsha zizokwabelana ngoR27.7 million, eziphethwe ngabantu abanokukhubazeka zizohlukaniselana uR3.9 million, eziphethwe ngabantu ababengamasosha alwela umzabalazo zizohlukaniselana ngoR7.9 million bese ezinye zabelana ngoR15.8 million."
UDuma uthe lo mgwaqo, oyibanga elingu-22.5 wamakhilomitha, uzokwenziwa izikhawu ezimbili. Ephetha uthe angu-72 amalungu omphakathi azohlomula ngokwakhiwa kabusha kwalo mgwaqo.
IMeya yaseMshwathi, uMnuz Mandla Zondi iveze ukuthi sekunesikhathi eside umphakathi owakhele le ndawo yaku-ward 3 ukhala ngokulungiselwa umgwaqo.
UZondi ubonge kakhulu uhulumeni ngokuthi ulalele bese uphendula izicelo zomphakathi.
Khonamanjalo amakhosi akhele le ndawo, iNkosi uNgubane kanye neNkosi uNdlovu, anxuse uDuma ukuthi alekelele nakwezinye izidingo zomphakathi ngisho ezingekho eMnyangweni wakhe.
UDuma ube esethula usonkontileka ozokwakha lo mgwaqo okuyinkampani yakwaBejives ebihamba nonjiniya, Umzansi Engineers.
UMPHAKATHI obusezinkundleni zaseMakeni, eMount Elias ngesikhathi kuzokwethulwa usonkontileka ozokwakha umgwaqo ku-ward 3
Image: SITHUNYELWE
IMEYA yaseMshwathi uMandla Zondi
Image: SITHUNYELWE