MBALI KHANYILE
AMAPHOYISA abophe abangu-211 abathinteka emacaleni ahlukene eMadadeni nasoSizweni, eNewcastle, emkhankasweni wokulwa nobugebengu obukule ndawo, kusukela ngoLwesine kuze kube izolo ekuseni.
Ababoshiwe banamacala okweba, awokubulala, awokushaya, ukudlwengula, ukutholakala nezimpahla ezintshontshiwe, izibhamu ezingekho emthethweni nezidakamizwa.
Kulo mkhankaso wezinsuku ezintathu kuboshwe abane abathinteka ecaleni lokucekela phansi impahla. Abangu-27 baboshelwe icala lokushaya. Abasolwa abahlanu baboshelwe amacala okuzama ukubulala abangu-31 bathinteka emacaleni okuba kuleli ngokungemthetho. Ababili batholwe nezibhamu ezingekho emthethweni. Ezindaweni zokucima ukoma okugasele kuzo abakwasidlodlo kuboshwe abangu-17 ngamacala okudayisa utshwala ngokungemthetho. Bangu-12 okushaqwe kubo izibhamu ezingekho emthethweni, insavunsavu yomthunzi wezinkukhu, i-mandrax ne-cocaine.
UNgqongqoshe wamaPhoyisa, uMnuz Bheki Cele noKhomishana waKwa-Zulu Natal, uLieutenant General Khombinkosi Jula bebeyingxenye yalo mkhankaso kanti bawashayele ihlombe amaphoyisa ngokubopha abasolwa.
ULt General Jula uthe: “Umphakathi waseMajuba kumele uyilindele imikhankaso efana nale njengoba amaphoyisa ematasa nemikhankaso yamaholidi okuphela konyaka. Singakuthokozela ukwesekwa yimiphakathi, ibambisane nathi ekulweni nobugebengu obudlangile obenziwa yintsha kule ndawo.”
Ngemumva kwemibiko yobugebengu obenzeka eNewcastle, umbutho wamaphoyisa wandise izinsiza ukuze kulekelelwe amaphoyisa endawo ngenhloso yokuqeda ubugebengu esifundeni saseMajuba.
AMAPHOYISA agasele ezindaweni zokucima ukoma eMadadeni nasoSizweni, eNewcastle, emkhankasweni wokulwa nobugebengu kusukela ngoLwesine kwaze kwaba yizolo entathakusa
Isithombe: Sithunyelwe
UNGQONGQOSHE wamaPhoyisa, uMnuz Bheki Cele, ehambisana namaphoyisa ngesikhathi kunomkhankaso wezinsuku ezintathu wokulwa nobugebengu eNewcastle. Kuboshwe abangu-11 ngamacala ehlukene Isithombe: Sithunyelwe
INSANGU etholwe yithimba lamaphoyisa ebelinomkhankaso wokulwa nobugebengu eNewcastle
Isithombe: Sithunyelwe