USAGCWELE amathafa umsolwa oyedwa, ongomunye wabathinteka ekwebiweni kwezinkomo KwaCeza, ezinye zazo ezazebiwe ngo-2018.
Abanye abasolwa ababili baboshwe kwesinye isigameko sokwebiwa kwezinkomo eNyezane, eShowe, emuva komkhankaso wamaphoyisa oqale ngesonto eledlule. Okhulumela amaphoyisa KwaZulu-Natal, uCaptain Nqobile Gwala, uthe inhloso yalo mkhankaso ukulwa nomkhuba wokwebiwa kwezinkomo odla lubi kulezi zindawo.
“Kuboshwe abasolwa ababili abaneminyaka engu-23 no-25 eNyezane, abatholakale nezinkomo ezimbili. Baboshiwe babekwa icala lokutholakala nemfuyo eyebiwe,” echaza.
UCaptain Gwala uthe ababoshiwe bavele enkantolo ngoLwesihlanu olwedlule.
Uthe esigamekweni saKwaCeza, kutholakale izinkomo eziyisishiyagalolunye. Kuthiwa umsolwa ubalekile wangena ehlathini, okumanje usafunwa ngamaphoyisa. UCaptain Gwala uthe lezi zinkomo zazebiwe eMountain View Mission, eNgome, ngoJanuwari 16 ngo-2018. Uthe zebiwa zisemadlelweni, kwavulwa icala esiteshini samaphoyisa eNgome.
UKhomishana wamaPhoyisa KwaZulu-Natal uLt-General Khombinkosi Jula, ukuncomile ukuboshwa kwalaba basolwa nokutholakala kwemfuyo.