Kubi kugogo nomzukulu abahlaselwe iRottweiler KwaDukuza
|Published
Ugogo nomzukulu baphuthunyiswe esibhedlela ngemuva kokuhlaselwa yinja. isithombe: IPSS Medical Rescue
ABEZIMO eziphuthumayo babizelwe KwaDukuza lapho isalukazi nomzukulu waso behlaselwe yinja yohlobo lweRottweiter ngoLwesine ntambama.
Abe-IPSS Medical Rescue bafike endaweni yesigameko bathola isalukazi esineminyaka eng-67 ubudala nomzukulu waso oneminyaka emithathu benamanxeba okulimala kabi ngenxa yokuhlaselwa yinja.
Bobabili balashelwe endaweni yesigameko ngaphambi kokuba baphuthunyiswe esibhedlela besesimeni esibucayi.
Imbangela yalesi sehlo kayaziwa kodwa amaphoyisa akwaDukuza ayaphenya.