Kubi kohlaselwe yizigebengu kuN2 eMandeni
Kubi kohlaselwe yizigebengu kuN2 eMandeni isithombe: IPSS Medical Rescue and IPSS Security Services
USESIMENI esibucayi umshayeli wemoto ediliva impahla kulandela ukuhlaselwa izigebengu zifuna ukuduna iveni yenkampani.
Lokhu kwenzeke kuN2 ngaseMandeni ngoLwesine ekuseni. Ngokombiko ovela endaweni yesehlo, iveni edilivayo kuthe iphuma kwi-toll gate yavinjwa yimoto encane inamadoda amane phakathi.
“Kuthiwa amadoda amane avulele ngenhlamvu ebhekise kumshayeli weveni, ngenhlanhla imoto yonogada eqapha iveni ibiseduze yaphendula ngenhlamvu ibhekise kubasolwa,” kusho uSamantha okhulumela abe-IPSS Medical Rescue and IPSS Security Services.
Abasolwa baphunyuke babaleka bengaphethe lutho. Umshayeli weveni odubuleke kabi uthole usizo lokuqala endaweni yesehlo waphuthunyiswa esibhedlela ngendiza enophephela emhlane.