SABELO NSELE
IPHALAMENDE lizophenya ngezimo abasebenzi nabahlali basemapulazini abahlala kuzona.
Kuthathwa lesi sinqumo nje sishubile isimo emiphakathini yasemapulazini, kunokubhekana ngeziqu zamehlo phakathi kwabalimi nabahlali basemapulazini.
IPhalamende lithathe isinqumo sokuthi ikomiti loMnyango weziSebenzi lisebenze ngokubambisana nekomiti elibhekele ukusebenza koMnyango wezoLimo, ukuThuthukiswa kweziNdawo zaseMakhaya nokuBuyiswa koMhlaba, ukuqinisekisa ukuthi livakashela abahlali nabasebenzi basemapulazini ukuyothola ngezimo abaphila kuzona.
Amakomiti azophinde abheke izinguquko esezenziwe nguhulumeni wentando yabantu ukushintsha impilo yabantu abahlala emapulazini.
Kuzophinde kuguqulwe eminye imithetho ethinta abahlali basemapulazini ukuze kubuyiswe isithunzi sabo.
Ilungu le-ANC uNkk Judith Shabalala lithe amakomiti kufanele asebenze ngokubambisana nomkhandlu wezifundazwe.
“Kufanele kubekwe umnqamulajuqu wokuphela kwenyanga.”
Le ndlu iwuphikisile umbono we-EFF wokuthi kusungulwe ikomiti elizimele elizokwenza uphenyo olunzulu mayelana nezinkinga ezibhekene nabahlali basemapulazini.
I-EFF ibifuna kuphinde kuphenywe ngemiholo yabasebenzi basemapulazini nokukhishwa ezindaweni abahlala kuzo abahlala emapulazini.
Esitatimendeni, i-EFF KwaZulu-Natal isishayele ihlombe isinqumo sePhalamende.
“I-EFF izokwenza isiqiniseko sokuthi konke okuvunyelwene ngakho ePhalamende, kuya ngokwamagama enkehli,” kusho uSihlalo we-EFF KwaZulu-Natal uMnuz Vusi Khoza.
“Abantu bakithi baphila ngaphansi kwezimo ezinzima ngenxa yokuthi baphucwa umhlaba, baphucwa isithunzi sabo. Kungumsebenzi wethu ukubuyisa ithemba nesithunzi somuntu omnyama kule lizwe lokhokho bethu.”