KUKHALWA ngesihluku sephoyisa likamasipala okuthiwa livalele endlini abafana ababili abakhubazekile lababhaxabula kanzima, libasola ngokuntshontsha izinwele zokufakelwa zikankosikazi walo, eSavanna Park, ngoMsombuluko.
Leli phoyisa kuthiwa livalele laba bagilwa, ona-13 nona-16, abafunda esikoleni sabakhubazekile iNingizimu Special School, labanenebula ngenduku lifuna bakhiphe izinwele zikankosikazi okuthiwa zibiza imali eshisiwe.
Unina kamgilwa ona-13 (igama lakhe eligodliwe ukuvikela umgilwa ngenxa yeminyaka yakhe), uthe liqale ukubashaya kusuka ngabo-10 emini laze labadedela ntambama.
“Ngendlela ingane yami ebilimele ngayo, kuphoqeleke ukuthi ngiyiphuthumise esibhedlela eRK Khan. Ingalo ayisebenzi, inezibazi zokushaywa emzimbeni kanti ithe umsolwa ubaphuzise nophethroli wabakhomba nangesibhamu, ethi abakhiphe lezi zinwele,” kulandisa yena.
Umgilwa ona-13, kuthiwa unenkinga yomqondo othatha kancane okwabangelwa ukuba sengozini yemoto ahlangabezana nayo esemncane okuphoqe ukuthi ahanjiswe kulesi sikole sabakhubazekile.
Lo mzali uthe bathole izinsongo kumsolwa zokuthi uma lezi zinwele zigcina ngokungabuyi, bazolutheza olunenkume.
Uthe ingane yakhe ayiphumi ebusuku ngenxa yokuthi kunemishanguzo eyisebenzisayo ngaphambi kokuthi ilale kodwa okummangalisile ukuthi kuthiwe yona nomngani wayo bagqekeza ngo-1 ekuseni kulo muzi, bantshontsha lezi zinwele abasolwa ngazo.
Imizamo yokuthola umndeni kamgilwa wesibili ayiphumelelanga.
UNgqongqoshe wezokuThuthukiswa koMphakathi KwaZulu-Natal, uNkk Nonhlanhla Khoza, usigxekile isenzo saleli phoyisa.
“Kushaqisa kakhulu ukuthi iphoyisa lomthetho lingakhomba izingane ngesibhamu liziphoqe ukuvuma ukuthi zigqekeze kwalo. Sizoxoxisana neMeya eThekwini, uMnuz Mxolisi Kaunda noNgqogngqoshe wezokuThutha ukuPhepha nokuXhumana koMphakathi esifundazweni, uNkk Peggy Nkonyeni, ukuqinisekisaa lezi zinsolo ziyaphenywa,” kusho uNkk Khoza.
UMnuz Njabulo Mabaso owusihlalo wenhlangano ebhekele abakhubazekile iVelanjabulo okuyiyo ehlabe ikhwelo ngalesi sigameko, uthe sikhulu isidingo sokuqinisa imikhankaso yokuqwashisa umphakathi ngabantu abakhubazekile.
“Lesi kube yisenzo esibi kakhulu. Okunye esingakuthandanga yindlela omunye wabahlengikazi esibhedlela iRK Khan lapho bekungeniswe khona lo mfana, alusingathe ngayo udaba okuthiwa uvele wabalindisa amahora yize ingane beyilimele esho nokuthi udaba lwabo aluphuthumi,” kusho uMabaso.
Okhulumela amaphoyisa KwaZulu-Natal uColonel Thembeka Mbele uthe kuvulwe icala lokuzama ukubulala nelokuthumba esiteshini samaphoyisa esiseMarrianhill.