AMI ngomumo amathimba aqaphe izinhlekelele ngenxa yesimo sezulu esingesihle KwaZulu-Natal, njengoba kukhishwe isexwayiso ngalesi simo njengoba kwezinye izindawo liyidliva, kanti kwezinye likhithikile.
Isexwayiso sakamuva sabakwa-South African Weather Service siveza ukuthi isimo sezulu esimbi sizoqhubeka sibonakale kusona sonke isifundazwe iKwaZulu-Natal.
Lokhu kufaka phakathi isigaba sesibili sokuduma kwezulu okuvela ukuthi kuzobonakala kulezi zifunda ezilandelayo, uThukela, iHarry Gwala, Ugu, iLembe, uMkhanyakude, yiZululand, uMzinyathi naseThekwini. Kulindeleke nokuthi kube nesigaba sesine somoya onamandla ezingxenyeni ezahlukene zeKwaZulu-Natal.
Kulindeleke ukuthi kube neqhwa ezindaweni ezifaka phakathi i-Underberg, Kokstad, iMpendle, iNkosi Langalibelele, Mpofana, oKhahlamba, Umuziwabantu naseMzimkhulu. Isigaba sesine somoya namhlanje kulindeleke ukuba siphazamise kulezi zindawo ezilandelayo, Abaqulusi, Alfred Duma, Big Five Hlabisa, Dannhauser, Emadlangeni, eNdumeni, Inkosi Langalibalele, Jozini, Mandeni, Maphumulo, eThekwini, KwaDukuza, Mfolozi, Ray Nkonyeni, Msinga, Mthonjaneni, Mtubatuba, Umdoni, uMlalazi, Newcastle, Nkandla, nakwaNongoma .
Lo moya kulindeleke ukuba uhambe ngesivinini sika 80 km/h. Lokhu kuthiwa kungaholela ekutheni kukhinyabezeke nengqalasizinda. Isigaba sesine semvula enamandla sibhekwe ukuba sifinyelele eKokstad, Ray Nkonyeni, Ubuhlebezwe, Umdoni, Umuziwabantu, Umzimkhulu, naseMzumbe.
Kuxwayiswa nokuthi lesi simo sezulu singaholela ekutheni kube khona abalahlekelwa yimpilo yabo.
UMphathiswa wezokuBusa ngokuBambisana neziNdaba zoMdabu, uMfu Thulasizwe Buthelezi, uthe bami ngomumo ukubhekana nanoma yisiphi isimo sezinhlekelele esingenzeka. Ukhuthaze abahlala ezindaweni eziyingozi ukuba baqaphe ngelokhozi noma bathole ezinye izindawo.