IPHUME ngembobo yenaliti i-ANC kukhethwa imeya entsha kaMasipala waseThekwini.
Le nhlangano ibiphelelwe ngamandla okuphatha lo mkhandlu ngokugcwele kulandela ukwehluleka ukuphumelela ngamalengiso okhethweni lohulumeni basekhaya ekuqaleni kwenyanga.
Isindiswe ngukushada nelinye lamaqembu amasha, i-ABC, ukuze ikwazi ukuphatha lo mkhandlu.
Lokhu kuholele ekutheni uMnuz Mxolisi Kaunda, we-ANC, akhethwe njengemeya yalo masipala.
Uhlule ohola inguyazana yeDA kulo mkhandlu, uNksz Nicole Graham, ngokuthola amavoti awu-113.
UNksz Graham, yena uthole angu-104.
I-ANC ithembise yase inika uMavundla we-ABC isikhundla sikasekela meya, yaphinde yamnikeza isikhundla kwisigungu esiphezulu kulo mkhandlu.
UMavundla ufakwe izolo kwisigungu esiphezulu, engena esikhaleni sekhansela le-ANC elisule isigubhukane, uNksz Ntokozo Sibiya.
Amaqembu amancane abe nesivumelwano sokusebenza ngokubambisana ukuze aketule i-ANC ekuphatheni lomkhandlu.
I-ABC ibikade imdibi munye namaqembu aphikisayo abefuna ukuqumba phansi i-ANC emhlanganweni wangoMsombuluko owagcina uchitheka ngenxa yokuhamba kukagesi.
Kepha izolo leli qembu livuke selicula elinye iculo, lavota ne-ANC.
Umshado walezi zinhlangano ushiye amaqembu aphikisayo ekhexile.
Lawa maqembu asole uMavundla ngokuwadayisa, asola nokuthi ukhokhelwe.
Amakhansela alawa maqembu ashiye angalazi kuMavundla, elinye lazwakala limfisela okubi.
Kepha uMavundla uphikile ukuthi ukhokhelwe ukuze alaxaze amaqembu amancane, bese evota ne-ANC.
Uthe okumenze wavuma ukusebenzisana ne-ANC wukuthi ufuna ukubona kuhanjiswa izidingo kubantu.
UMavundla akamusha kwi-ANC njengoba eke waba wusihlalo wale nhlangano kwisifunda Inkosi Bhambatha, waphinda waba yimeya yoMasipala uMvoti.
Kepha ubudlelwane bakhe ne-ANC babuye baba muncu njengoba agcina eshiya eMvoti.
Ngaphambi kokuthi asungule i-ABC, wajoyina iNFP.
Nakuyona akahlalanga isikhathi eside.