Inyanga yodumo isolwa ngokukhwabanisela i-Absa

BAVELE enkantolo eshushisa amacala amabhizinisi abasolwa ababili ePalm Ridge izolo, babhekene namacala okukhwabanisa, ukweba, nokushushumbisa imali.

Lokhu kumayelana nemali ebalelwa kuR103 million eyebiwa e-Absa yafakwa emabhange ahlukene. Liyingxenye yecala likaMnuz Xolela Masebeni owayeyiSpecialist Engineer kuleli bhange egatsheni eliseSandton, phakathi kukaSepthemba ngoDisemba nyakenye.

UMasebeni wadutshulwa wabulawa ngoFebhuwari emzini wakhe eZibeleni, KwaZulu-Natal.

UCaptain Simphiwe Mhlongo uthi uphenyo lwenziwa ngokubambisana phakathi kophiko oluphenya amacala amabhizinisi eGoli, nabeTectical Response eThekwini ngasePinetown.

Uphenyo luholele ekutheni kubanjwe umelaphi wendabuko ozinze eMelmoth, uMnuz Khumbulani Elvis Ntombela (43) odume ngelikaMabalengwe. Kuboshwe nentombi kaMasebeni uNksz Nonelwa Nondlazi (29), owazinikela emaphoyiseni ehamba nabammeli.

UNtombela noNondlazi babekwe amacala okukhwabanisa, ukweba nokushushumbisa imali ngoLwesibili nangoLwesithathu. Bobabili babanjwe ngenxa yama-akhawunti amabhange afakelwa le mali yokwebiwa.

Kubuye kwaboshwa abanye abasolwa, owesimame oneminyaka engu-24, othandana womsolwa wesithathu uMnuz Gershom Matomane (29), ongumqondisi wenkampani ezinze eWestern Cape iMaduna Gubevu Projects Trading (PTY) Ltd.

UMatomane waboshwa ngoJanuwari kulo nyaka nomsolwa wesibili uNksz Athembile Mpani (21). UMatomane noMpani bakhishwa ngebheyili kaR30 000 noR50 000 umuntu emunye. Kulindeleke ukuthi babuyele enkantolo ngoJuni 20, 2022.

UNtombela noNondlazi bagqunywe esitokisini, kanti bazovela ngoMeyi 18 enkantolo lapho bazofaka izicelo zebheyili.