NKOSIKHONA CELE
LISHONELE endlini yentombi ikhehla eliwumvangeli obehola amathempeli awu-28 KwaShembe eBuhleni, e-Underberg oThandweni.
UMvangeli Lazarus Gogo Nzuza (82) waseBulwer, uficwe ukufa esendlini yentombi yakhe abejola nayo, uNksz Lamlile Msomi (38) waseNqatsheni, e-Underberg. UNzuza ubesentombini nje, ubeshiye unkosikazi wakhe uNkk Thandekile Nzuza, endlini abaneminyala ewu-40 beshadile.
ISolezwe NgoMgqibelo lithole ukuthi uMvangeli Nzuza ugule amasonto ambalwa kwamenela. Kuthiwa intombi ayiwazisanga amalungu omndeni kaNzuza, ngalo mshophi. Yavuka ekuseni yayisa isidumbu emakhazeni.
Kuthiwa umndeni kamvangeli uzwe ngomakhelwane bentombi ukuthi uNzuza ushonile. Kuthiwa athukuthele anikela kubo kwentombi, ayifica igoyile ikhanyise amakhandlela.
"Ivele yasuka emakhandleleni yavuka umbhejazane. Yabatshela ukuthi abahambe izozingcwabela isithandwa sayo ayidingi usizo. Ize yabilisa amanzi isho ukubabhunyela ngawo," kuchaza umthombo.
Indodakazi endala kamvangeli, uNksz Gcinile Nzuza, izwakalise ukukhathazeka ngesimo abakusona. Iveze ukuthi isidumbu sibhadle emakhazeni ngenxa yombango oshisa phansi phakathi kwabo nentombi. Uchaze intombi njengesichwensi, umgcwaneki ongenandaba nemizwa yabo.
"Angimazi ukuthi yini le ayifunayo ngoba ujole nobaba esaphila. Uma esegweva nesidumbu uchaza ukuthini ?“ kubuza indodakazi.
Igonyulukile yatshela intatheli ukuthi yize uyise ebesekhulile kodwa ubengumuntu obathandayo abantu besifazane. Indodakazi ithe uma ihlawumbisela, yathi uyise ubenazo izintombi ezicela eshumini.
Indodakazi ibalise ngokuthi isimo sokubangwa kwesidumbu siyamhlukumeza unina. Kuthiwa intombi kade yaqala ukuba yiphela endlebeni njengoba ukuthandana kwabo, kwaqalekiswa nguNkk Nzuza kodwa umvangeli waphikelela.
ISolezwe NgoMgqibelo lithole ukuthi umka Mvangeli ngolunye usuku unqandwe yizingane zakhe efuna ukuzifaka ezimotweni ekhala ngokuthi uncamela ukufa kunokuthi aklolodelwe yintombazane.
Indlela uMvangeli Nzuza abesha amashushu ngakhona ngale ntombi, kuthiwa waze waqamba amanga kumkakhe wathi utholele izinkomo indawo enhle enamadlelo lapho izinkomo zizodla khona zisuthe. Nebala wazithatha izinkomo ezingu-22, amagusha angu-15 nezimbuzi ezingu-20 konke ethi ukuyisa "endaweni enhle." Ngokuhamba kwesikhathi kwatholakala ukuthi indawo enhle yisemzini wentombi, e-Underberg.
"Kuyiqiniso ubaba wayithatha yonke imfuyo wayiyisa kubo kwentombi," kuqinisekisa indodakazi.
Kumanje udaba lombango lusenkantolo akwaziwa ukuthi iyiphi ezogoba uphondo. Intombi ithe isidumbu somvangeli singamane sibole, sidliwe yizimpethu kunokuthi singcwatshwe ngabakwaNzuza.
ISolezwe NgoMgqibelo likhulume nentombi ebivutha ingabaselwe.
Income uMvangeli yathi yize ebesekhulile kodwa ubegijima embhedeni. "Indoda yami ibikuthokozela ukuba nami. Ibidlalisela kamnandi emathangeni. Yena-ke esibanga naye isidumbu, awumbuze ukuthi ubaba wayegcine nini ukum........(egagula inkonzo yasekameleni),'' isho kanje.
Intombi iqhube yathi : "Lesi sidumbu ngiyafunga, ngiyagomela sizobolela emakhazeni. Ngeke ngivume singcwatshwe yibona. Ubaba ubethanda mina ngaphezulu kwabo. Futhi ubaba wamshiya ngoba i...yakhe yayibanda (egagula isitho sangasese) eyami ishisa bhe.“
Seyiphetha ithe inencwadi esayinwe nguMvangeli eyigunyaza ukuba imngcwabe. Kuthe uma intatheli icela ukuyibona, inyombi yabuza ukuthi ingubani ukuthi isingaze ifune ukukhonjiswa leyo ncwadi eyimfihlo.
Okhulumela amaNazaretha aseBuhleni, uThokozani Mncwabe uthe umthetho wasebandleni awukugunyazi ukujola kwabavangeli. Uthe umuntu kuye kube kuhle ukuba aganwe. Uthe bazozama ukulekelela umndeni kulolu bishi obhekene nalo. Uthe uMvangeli Nzuza ubemazi njengendoda ethobela umthetho futhi engenabatha wathi lokhu osekwenzeka egameni lakhe, kuyethusa.