Injabulo kusula owaseBritain

Nonkululeko Nhlapo|Published 3 years ago

BANCANE abakhalayo ngokusula kukaNdunankulu owengamele elaseBritain uBoris Johnson.

Ukusula kukaJohnson kulandela izigigaba zokusula kongqongqoshe abaningi. Uthe yize esulile, uzohlala esikhundleni sakhe kuze kukhethwe umholi omusha.

Izinkinga zakhe zaqala ngesikhathi esolwa ngokuhlela imicimbi eminingi yokuzijabulisa ngesikhathi izwe lisakhungethwe wubhubhane lweCovid-19.

Okunye okwamdalela amazinyo abushelelezi wukuqasha kwakhe isekela likaSotshwebhu, uChristopher Pincher, osolwa ngokunukubeza ngokocansi.

Izwe laseRussia lithi liphume nobovu ngokusula kukaJohnson abamsola ngokugxambukela empini yabo nezwe lase-Ukraine ngokusiza elikaVolodymyr Zelenskiy ngezikhali.

Nangaphambi kokuba umengameli uVladimir Putin ahlasele i-Ukraine ngoFebhuwari, uJohnson wayemgxeke kaningi uPutin embeka njengesikhulu esingenaluzwelo nesingenangqondo saseKremlin esasifaka umhlaba engozini ‘ngezifiso zakhe zobuhlanya’.