KUBE nenhlokomo kwakhala amakhwela, kwashaywa namavuvuzela ngaphandle kweNkantolo yeMantshi yaseMzimkhulu izolo ngemuva kokuhoxiswa kwamacala abebekwe iMeya yoMkhandlu waseHarry Gwala, uMnuz Mluleki Ndobe nemenenja kaMasipala waseMzimkhulu uMnuz Zweliphansi Sikhosana.
UNdobe noSikhosana bebebekwe amacala amathathu, elilodwa lokubulala owayenguNobhala-jikelele we-ANCYL uMnuz Sindiso Magaqa nokuzama ukubulala abesifazane ayehamba nabo, uNksz Nontsikelelo Mafa noNksz Jabulile Msiya ngoJulayi 2017.
Abesilisa abathathu abebeboshwe noNdobe noSikhosana, uMnuz Sibonelo Myeza ummangalelwa wokuqala owayeyiphoyisa esebenza oPhikweni iTactical Response Team (TRT), ummangalelwa wesibili uMnuz Mbulelo Mpofana ongusomabhizinisi nommangalelwa wesihlanu uMnuz Mlungisi Ncalane naye okuthiwa ubeyiphoyisa, icala labo lisazoqhubeka njengoba kulindeleke ukuthi kulalelwe isicelo sabo sebheyili namhlanje.
Izolo icala lize langena ngemuva kwehora lesibili kungacaci ukuthi kwenzekani.
Umshushisi,u-Adv Sohana Moodley, uthe uthathe isinqumo sokuwahoxisa amacala kaNdobe noSikhosana ngoba akaqondi ukuthi bebeboshwe ngaphansi kwamiphi imibandela.
Abalandeli be-ANC abafuna ubulungiswa bebebhikisha ngaphandle kwenkantolobethi bethe izingqwembe bethi abasolwa abangadedelwa ngebheyili. Isithombe: Motshwari Mofokeng/African News Agency (ANA)
Uthe ubelokhu elinde ubufakazi obuvela kumphenyi wecala obuhlanganisa uNdobe noSikhosana necala kodwa bungafiki.
“Ngenxa yokushoda kobufakazi obuhlanganisa ummangalelwa wesithathu (Sikhosana) nommangalelwa wesine (Ndobe) ngithathe isinqumo sokuthi ngiwahoxise okwesikhashana amacala ababekwe wona,’’ kusho u-Adv Moodley.
Ummeli kaNdobe, u-Avril Potgieter uthe yize ekwamukela ukuhoxiswa kwamacala abebekwe amumele kodwa akajabule ngendlela uMbuso osingathe ngayo lolu daba.
UPotgieter uthe amumele uhlaliswe ezitokisini cishe izinsuku ezingu-10 njengoba eboshwe ngoMashi 16 waze wadedelwa ngoMashi 25 kodwa ekugcineni uMbuso usuyawahoxisa amacala obumbeke wona.
“Ukuziphatha koMbuso akugculisi futhi akwamukelekile,” kusho uPotgieter.
Uthe into eyenziwe uMbuso ubopha amumele ngaphandle kobufakazi ayinabo ubulungiswa.
Ngemuva kokuhoxiswa kwamacala uNdobe noSikhosana basukumile ebhokisini bashiya abathathu abebeboshwe nabo.
Ngemuva kokuzwakala kwezindaba zokuthi amacala abebekwe uNdobe noSikhosana asehoxisiwe abalandeli babo abebegcwele ngaphandle enkantolo bagijime bafuna ukungena ngaphakathi enkantolo kodwa amaphoyisa abavimba.
Kukhale amakhwela kwashaywa namavuvuzela bejabulela ukudedelwa kwabaholi babo.
Umlandeli kaNdobe ocele ukuthi angadalulwa uthe bebevele bazi ukuthi uyasukelwa.