INDLUNKULU kaZulu isiwachithile amahlebezi okuthi iphezu kwezinhlelo zokugcoba njengeSilo osembangweni wesihlalo sobukhosi bukaZulu, uMntwana uSimakade Zulu, ngempelasonto.
INdlunkulu ithe azikho izinhlelo zokugcoba ngokusemthethweni ozongena ezihlangwini zeSilo uGoodwill Zwelithini kaBhekuzulu njengoba kusalindwe umbiko wethimba elijutshwe wuNgqongqoshe wezokuBusa ngokuBambisana neziNdaba zoMdabu kuzwelonke, uDkt Nkosazana Dlamini Zuma, ukuba lixazulule umbango wesihlalo sobukhosi bukaZulu.
INdlunkulu isole uMntwana uLondiwe Ngcamu, ngokusabalalisa amahlebezi.
Amahlebezi okugcotshwa kukaMntwana uSimakade aqale ukusabalala ngoLwesibili, ngesikhathi uMntwana uLondiwe ebiza isithangami sabezindaba.
Ngesikhathi abezindaba bemenywa ukuba beze esithangamini, batshelwa ukuthi kuzomenyezelwa izinhlelo zokugcotshwa kukaMntwana uSimakade.
Kepha uMntwana uLondiwe wabuye washaya ungqimphothwe esithangamini, wangabe esafuna ukukhuluma ngezinhlelo zokugcotshwa kukaMntwana uSimakade.
Okhulumela iNdlunkulu, uMntwana uMbonisi Zulu, uthe kungamampunge lokhu okukhulunywa wuMntwana uLondiwe.
“Sifisa ukusho ukuthi udukisa izwe ngenhloso yokuzizuzisa yena qobo lwakhe. INdlunkulu iyaziqhelelanisa nazozonke izitatimende ezikhiphile.
“INdlunkulu ifisa ukusho futhi ukuthi uLondiwe Ngcamu, akaziwa eNdlunkulu. Ngakho konke akwenzayo usuke engathunyiwe, usuke eziqolela abantu beSilo nje.”
UMntwana uMbonisi uthe uyena yedwa oqokwe ukuba akhulumele iNdlunkulu.
“INdlunkulu ifisa ukukhipha isexwayiso kuLondiwe Ngcamu ukuthi izomthathela izinyathelo zomthetho uma eqhubeka nokuqola abantu ngegama leSilo uMdlokombane, uMntwana uSimakade kaZwelithini, nangegama leNdlunkulu yonkana.”
UMntwana uLondiwe ukuphikile ukuthi amahlebezi asatshalaliswe uyena.
“Angikaze ngikhulume ngaleyo nto. Zathi noma izintatheli zingibuza ngayo, ngazitshela ukuthi azithinte iNdlunkulu.”
Uthe inhloso yesithangami sabezindaba kwakungukucathulisa izintatheli ngezinto ezithinta iNdlunkulu.
UMntwana uLondiwe uthe kuyamthusa ukuthi iNdlunkulu kayimazi.
Ubuze ukuthi kungani iNdlunkulu ikusho manje lokho ekubeni kade aqala ukukhuluma izinto ezithinta iNdlunkulu?
UMntwana uLondiwe waba ngowokuqala ukuphumela obala, azwakalise ukweseka uMntwana uSimakade, ngesikhathi kuqala umbango wesihlalo sobukhosi.
Ukuphikile nokuthi uqola abantu ngegama likaMdlokombane.
Ushisa phansi umbango wesihlalo sobukhosi eNdlunkulu njengoba kukhona abafuna ukuba iSilo uMisuzulu kaZwelithini, sigcotshwe ngokusemthethweni.
Icala elithinta lo mbango kade lilalelwe eNkantolo eNkulu eMgungundlovu, ngoLwesithathu.
Kulindeleke ukuthi inkantolo ikhiphe isinqumo maduze ngawo.