I-South African Social Security Agency (Sassa), ithi ikhokhe uR6.9 billion, kubantu abangaphezu kuka-20 million, kwisibonelelo sikaR350 esasinikezwa abangasebenzi ngoba kuhlasele iCorona.
Le mali isikhokhelwe abantu kusukela kwaqala uhlelo lokubonelela abangasebenzi kwaze kwaba sekupheleni kuka-Okthoba.
Lokhu kushiwo uNgqongqoshe wezokuThuthukiswa koMphakathi uNksz Lindiwe Zulu, ephendula umbuzo welungu le-IFP ePhalamende, uNksz Liezl van der Merwe.
UNksz Van der Merwe ubuze ukuthi bangaki abantu abahlomula ngoR350, nemali esikhokhwe uhulumeni kulolu hlelo.
Ubefuna nokwazi ukuthi bangaki abantu abafaka izicelo kodwa banqatshwa, abadlulisele phambili isicelo sabo sokungabhekelelwa kanjalo nabokufika abahlomulile.
Uphinde wabuza ukuthi bangaki abasebenzi bakahulumeni abahlomule kulolu hlelo. Ephendula uNksz Zulu uthe abantu asebehlomulile bangu-19 753 894.
“Imali esikhokhiwe inguR6 913 862 900.”
UNksz Zulu uthe imali kaSepthemba no-Okthoba ihlanganisiwe yaba uR700.
Uthe lokhu kuzosiza ukuxazulula inkinga yalaba abangakakhokhelwa ukuze kungakapakeli kuJanuwari.
UNksz Zulu uthe zingu-6 419 015 izicelo ezachithwa.
Uthe abantu abachithiwe besingafani isibalo sabo zinyanga zonke njengoba cishe bebebalelwa ku-2 180 725 ngoMeyi, ngo-Okthoba baba ngu-3 043 009.
UNksz Zulu uthe bangu-1 867 abokufika abafaka izicelo kodwa abakaze bakhokhelwe ngoba udaba lwabo lusacutshungulwa nezinye izinhlangano.
UNksz Zulu uthe bangu-241 abasebenzi bakahulumeni okutholakale ukuthi bafaka izicelo, bakhokhelwa.
Uthe bakhokhelwa ngoba iSassa ibingayitholi imininingwane yabo ohlwini lwabasebenzi bakahulumeni. Uthe lokhu bayakulungisa.