LUGCINE lugobile uphondo kubameli bekhomishini ephenya ngokulawulwa kombuso yidlanzana abagcine sebevumelana nabameli bakaZuma ngendlela azobuzwa ngayo imibuzo kulandela ukuhoxa kwakhe kule khomishini.
Kusukela ngoMsombuluko abameli bakaZuma, naye uqobo, bazwakalise ukungenami ngendlela ahlohlwa ngayo imibuzo abathe kuyefana nokuthi usequliswa icala.
NgoLwesithathu kuphele usuku kunongabazane ngokuth uZuma usazoke aphinde alubeke kwikhomishini kaZondo ngemuva kokukhalaza ngendlela ummeli wekhomishini, ohola ubufakazi, u-Advocated Paul Prestorious ayembuza ngayo imibuzo.
Ngemuva kokuhlangana nabameli bekhomishini ngoLwesine, abameli bakaZuma ngoLwesihlanu ekuseni bazise ikhomishini ukuthi lowo owayengumengameli kuleli usehoxile ekwethuleni ubufakazi kule khomishini. Lokhu kushiye uSihlalo wekhomishini, uJaji Raymond Zondo, esokola kwazise wayezicelile zombili izinhlangothi zabameli ukuthi zimazise uma zingasitholi isisombululo ngomhlahlandlela ngendlela okubuzwa ngayo uZuma imibuzo.
U-Advocate Muzi Sikhakhane ngoLwesihlanu omemezele ukuthi uMnuz Jacob Zuma ngeke esaqhubeka nokufakaza kwikhomishini kaZondo. Isithombe: Nokuthula Mbatha / African News Agency (ANA)
Ngemuva komhlangano ophuthumayo nabo, ube esememezela ukuthi bagcine bevumelene ngokuthi uZuma uzobhalela ikhomishini izitatimende ephendula la asolwa khona ezitatimendeni ezenziwe abanye ofakazi kwikhomishini,
UZondo ube eseveza nokuthi bavumele ngokuthi emasontweni amabili azayo bazodingida nethimba labameli bakaZuma ukuthola isivumelwano ngokubuya kwakhe kule khomishini.
“Sisakucubungula ukuthi ngalesi sivumelwano, owayengumengameli usazobuya azofakaza kwikhomishini. Ngenxa yalesi sivumelwano siyacabanga futhi ukuthi sizoncipha isikhathi azovela ngaso kwikhomishini. Ngeke sisaqhubeka nokufakaza kowayengumengameli namhlanje,” kuphetha uZondo othe kubathathe cishe imizuzu elishumi ukufinyelela kulesi sivumelwano.
UZondo ubonge uZuma ngokunikeza ikhomishini ithuba lokuthi limpheke ngemibuzo nokuthi usazobuya azofakaza kwikhomishini uma sekwenzekile okuvunyelwane ngakho.
Ikhomishini izoqhubeka ngoMsombuluko.