SEKUVELE i-video engahluziwe eveza konke okwenzeka ngosuku okwabulawa ngalo uMnuz Lindani Myeni, eHawaii eMelika.
Kule video uMyeni uvela eyongena emzini thizeni oseHonolulu, egqoke umqhele engena elandela ngemuva kwababili ababemile okuthiwa bayizithandani.
Ubonakala edlule aye ethempelini eliseduze komuzi wabo. Ufika akhumule izicathulo ethempelini, emuva kwalokho kuvela exolisa kulaba ababili.
Kuthiwa emuva mhlawumbe kwemizuzwana ewu-40, uMyeni ubonakala ephuma kule ndlu ebese esexolisa kulezi zithandani. Kuthi kusenjalo kuvele owesifazane eshayele u911, ebika ngokugqekezelwa. Ngenkathi lo wesifazane ebikela amaphoyisa uthi uMyeni ubesendlini yabo egqekeza. Kuthiwa ngokwemibiko yabanikazi bomuzi bathi akukho okwathathwa emzini wabo.
Abameli bomndeni kaMyeni bathi bakholelwa ekutheni le video ihambisana nokuthi wayebheka ithempeli eliseduze komuzi walezi zithandani. Ummeli uJim Bickerton, uveze ukuthi inkantolo iphoqe izikhulu ukuthi zikhiphe i-video ingahluziwe. Amaphoyisa nawo kwathiwa awalethe amarekhodi ezingcingo ze-911 zosuku lwesigameko.
Kwingxoxo uBickerton abe nayo noMnuz William Denselow kwi-eNCA uveze ukuthi ngenkathi uMyeni ehamba kulo muzi wayengacasukile.
“Amazwi akhe okugcina kwaba ukucela uxolo kwaze kwaba uyasithela,” kubeka uBickerton.
Kule video eyayikhishwe kuqala kuvela amaphoyisa eya kuMyeni owawabuza ukuthi angobani, wona avele amdubula njengoba ashonela esibhedlela. Uthe bebengazi ukuthi uMyeni wayexolisa futhi amaphoyisa abenayo le video kodwa abiza isithangami sabezindaba athi ahlaselwa kungekho sidingo.
UBickerton uthe bazoqhubeka bafune iqiniso ukuze kwaziwe ukuthi kwenzakalani.