I-The Muffinz izodlalela abafundi baseNorway
IQEMBU i The Muffinz lise Norway lapho lijikeleza khona liqhakambisa umculo wakuleli. Kusuka kwesokunxele ngu Simphiwe Kulla , Karabo Moeketsi , Gregory Mabusela , Mthabisi Sibanda no Sifiso Buthelezi IQEMBU i The Muffinz lise Norway lapho lijikeleza khona liqhakambisa umculo wakuleli. Kusuka kwesokunxele ngu Simphiwe Kulla , Karabo Moeketsi , Gregory Mabusela , Mthabisi Sibanda no Sifiso Buthelezi
NONHLANHLA MKHABELA
ZISHAYA umjikelezo eNorway lapho zizodlala khona amasonto amabili izinsizwa zeqembu le-acapella laseGoli, iThe Muffinz, eselizakhele udumo ngamaphimbo amtoti.
Iqembu likhethwe ohlelweni lwabeConcerts South Africa olunikeza abaculi ithuba lokuyodlala kuleli lizwe elinobudlelwano nabo noluxhaswe ngumnyango wezangaphandle waseNorway, South African Music Rights Organisation neRikskonsertene.
I-The Muffinz yakhiwe ngamalungu amahlanu okungoSimphiwe “Simz” Kulla, Karabo “Skabz” Moeketsi, Gregory “Keke” Mabusela, Mthabisi “Mthae” Sibanda noSfiso “Atomza” Buthelezi.
URagnhild Tveitan, umhleli wamakhonsathi esikoleni esiseNorway lapho iThe Muffinz izobe idlalela khona izinkumbi zabafundi ababalelwa ku-4 000, uthe kubalulekile ukuthi kuqhakanjiswe ithalente lase-Afrika nakwamanye amazwe.
“Kumele kukhonjiswe ukuthi akhona amaciko nabaculi abasebasha abaphila impilo eyisibonelo nokuyinto engavezwa ezindabeni leyo. Ngifuna ukusiza ukuqeda inkolelo engeyona nge-Afrika nengeyona iqiniso ngeNorway. Kubalulekile ukuveza amasiko abantu ngendlela eyiyo,” kusho uRagnhild.
URagnhild, oke wahlala kuleli iminyaka eyisikhombisa, uthe iThe Muffinz izodlala amakhonsathi amabili njalo ngosuku iphinde icobelelane ngolwazi nabafundi abalungiselela ukuya enyuvesi.
I-The Muffinz yamukelwe ngesasasa elikhulu emculweni njengoba ikhale yemuka nendondo yeBest Group Album kumaMetro Awards akulo nyaka nge-albhamu yayo yokuqala ethi Have You Heard?