I-SACP ifuna iqiniso kumbulali kaHani

UNOBHALA Jikelele weSACP uDkt Blade Nzimande uthe bafuna agonyuluke ngokuthi wayethunywe ngubani kuqala uJanusz Walus owabulala uNobhala Jikelele wale nhlangano uMnuz Chris Hani.

Uthe njengoba uWalus ebuyela enkantolo namhlanje ukuyophikisa isinqumo sikaNgqongqoshe wezoBulungiswa sokungamniki ushwele bacela ukuthi sichithwe lesi sicelo.

“Sifuna iqiniso ngaphambi kokuthi kukhulunywe ngoshwele kaWalus. Akasitshele ukuthi wayethunywe wubani ukuthi abulale uHani. Abameli bethu bazobe besenkantolo ukwenza isiqiniseko sokuthi uhlala ejele. Ngeke sivume ukuthi ababulali banikwe ushwele.”

Izolo iSACP yethule umkhankaso wayo weRed October e-OR Tambo Hall, eMthatha.

Indikimba yeRed October yalo nyaka ithi Build Broad Patriotic and Popular Left Fronts ­- Mobilise to Fix our Country.

UNzimande uthe bafuna wonke amakhomanisi abe yizishoshovu zomphakathi ukuze ahambele abantu aqonde izinkinga zabo.

“Sizogxila ekuqiniseni ubudlelwane bethu nemiphakathi ukuqinisekisa ukuthi silungisa izinkinga ezibhekene nemiphakathi. Sifuna ukulungisa umnotho ukuze silwe nokungalingani kwabantu nokusweleka kwemisebenzi nobubha. Sifuna ukuvikela imvelo ngoba isivuvujikelele asizibekile phansi. Isivuvujikelele sidalwa wongxiwa abahlale befuna ukwandisa imali yabo ngokuxhaphaza abantu nemvelo.”

Uthe bafuna umphakathi ube yingxenye yezinhlelo zentuthuko ukuze ungazizwa usele ngaphandle.

UNzimande uthe amadoda ashaya, abulale abesifazane, izingane nabathandana nabobulili obufanayo ayizishimane okufanele zijeziswe wumthetho.

Ucele izinkampani nomphakathi ukuthi bafundise izingane zabafana indlela yokuziphatha nokuthi uphathwa kanjani umuntu wesifazane.

“Njengoba kunohlelo lweTake a Girl Child to Work kufanele kube nolokuthatha abafana baye emsebenzini. Abaqale besebancane ukubona ukuthi kuyalingwana akekho okufanele aphathwe kabi. Asihambisani nodlame lwanoma yiluphi uhlobo, sithi sekwanele. Uma intombazane ikwala dlulela phambili asikho isidingo sokuyibulala.”

Ucele abantu baseNingizimu Afrika ukuthi babe nesineke sabantu bokufika ngoba baxoshwe yizinkinga emazweni abo.

Uthe bayalweseka uhlelo lukahulumeni lweNational Health Insurance (NHI) ngoba izinkampani zama-medical aid ziqola abantu.