UKUQUBUKA kweCoronavirus (Covid-19) kucishe kwaphazamisa izinhlelo zokuqala kwezingxoxo zokuqeda isiteleka e-University of Zululand, Ongoye, osekumiswe nemicimbi yokuthweswa iziqu.
Abaphathi besikhungo banqume ukuthi bavale nesikhungo seseRichards Bay ebisithintekile ngesiteleka, kulandelwa umyalelo kaMengameli Cyril Ramaphosa.
Bekulindeleke ukuthi kuqale izingxoxo phakathi kwabaphathi besikhungo nezitshudeni, emuva kokuba ngesonto eledlule uNgqongqoshe weMfundo ePhakeme uDkt Blade Nzimande ekhiphe lowo myalelo.
Bekubhekwe nokuthi kulezi zingxoxo kubhungwe ngokuthi luqala nini uhlelo lokukhetha isigungu somkhandlu wezitshudeni emuva kokwesula kukaMnuz Bongumusa Makhoba obeqokwe wumkhandlu ukuba ngu-Administrator.
Isitatimende esikhishwe yisikhungo siveza ukuthi izitshudeni zizobuye zaziswe ukuthi kuvulwa nini.
Kuvela nokuthi yonke imihlangano nemigubho okumele ibe nabantu abaningi isimisiwe.
“Abasebenzi bayakhuthazwa ukuthi basebenzise ubuchwepheshe uma kudingeka baxhumane, ukuze bagweme ukuhlangana. Abaphathi besikhungo, umkhandlu noMnyango wezeMfundo ePhakeme bazobuye bazise izitshudeni nabasebenzi uma kukhona okunye okudingeka kwaziwe mayelana nezinhlelo zokunqanda lolu bhubhane,” kusho isitatimende.
Okhulumela isikhungo, uNkk Gcina Nhleko-Mdluli, uthe baphazamiseke kakhulu ngoba bese ziqalile izinhlelo zokwenza izingxoxo ngesiteleka.
“Okwamanje akukho okubambekayo mayelana nezingxoxo ngoba konke sekuphazanyiswe yindaba yeCoronavirus. Kudingeke ukuthi kusukela ngoLwesibili ivalwe ukuze siqinisekise ukuthi silwa nokubhebhetheka kwalolu bhubhane,” echaza.
Ukuqinisekisile ukuthi bahlehlise nomcimbi wokuthweswa kweziqu, obekumele ube ngoMeyi. UNkk Nhleko-Mdluli uthe bazobuye babeke kahle ezinye izinsuku uma sekudlule lesi simo.
Ngesonto eledlule umkhandlu walesi sikhungo oholwa nguSihlalo uNksz Nomarashiya Caluza, wabiza isithangami ucacisa ngesimo sesikhungo.
Izolo uNksz Caluza uthe ukuqubuka kwalolu bhubhane akumele kubambe izingxoxo.
“Besivele sithe izitshudeni kumele zenze indlela yokuxhumana nabaphathi besikhungo. Kumele uma kuphela lolu bhubhane, ukufunda kubuyele esimeni ngokushesha. Sizwile ukuthi bekukhona okwenzekayo ngoba abaphathi besikhungo bese bewutholile nombiko kwabakwaNSFAS ngezitshudeni ebezingakhokheliwe,” kusho yena.
UMxolisi Khanyile, ongumholi weSasco, uthe bahlangane noNksz Caluza ngeSonto ukuzama umhlahlandlela. Uthe bazimisele ukuthi ziqhubeke izingxoxo ukuze uma kushabalala iCovid-19 babuyele kahle esikoleni.