KHETHA SANGWENI
I-ANC KwaZulu-Natal, ithi iyakwemukela ukwesula kukaNdunankulu wesifundazwe uMnuz Sihle Zikalala esikhundleni. Isitatimende se-ANC esifundazweni sikhishwe ngoLwesihlanu emini, imemezela ukuthi uZikalala ucele ukuphuma esikhundleni ngesikhathi enomhlangano nabaholi benhlangano. Isitatimende sikhomba ukuthi siphuma ehhovisi likaNobhala omusha uMnuz Bheki Mtolo.
Ukwesula kukaZikalala kulandela umhlangano wokuqala wesigungu esiphezulu se-ANC esikhethwe engqungqutheleni ebise-Olive Convention Centre ngenyanga edlule. UZikalala engquungqutheleni ukhale ngaphansi embangweni wesikhundla sikasihlalo kwangena uMnuz Siboniso Duma.
Kuphuma isitatimende nje, naye uZikalala ubesevele ebabizile abezindaba eMayville ezoxoxa nabo ngehora lesithathu ngalo uLwesihlanu. Ukuphuma kukaZikalala kuthiwa kuhambisana nokushintsha kongqongqoshe esifundazweni, okungakaveli ukuthi kuzophuma bani kungene bani. Izimpukane eziluhlaza zithi uDuma uzongena kuhulumeni wesifundazwe njengoba esewuSihlalo we-ANC.