I-Afrika Mamas ibashiye besahalela impinda e-Italy ngesicathamiya

IQEMBU lesicathamiya elakhiwe ngabantu besifazane bodwa, i-Afrika Mamas, libashiye besahalela impinda kuchungechunge lwamakhonsathi alo abephesheya kwezilwandle e-Italy. Isolezwe lizibonele amanye ama-video lapho leli qembu belicelwa impinda. Umholi we-Afrika Mamas, uNtombi Lushaba, uthe basuka eNingizimu Afrika ngoJuni 26, badlulela e-Ethiopia ngaphambi kokufinyelela eRome, e-Italy, ngomhla ka-27.

"Lapho safika samukelwa umshayeli owayethunyelwe abagqugquzeli befestiveli. Sahamba amahora amathathu sesibheke ePerugia, lapho safika sahlangana namanye amaciko asemazweni ase-Afrika anjengaseKenya, Tanzania, Nigeria, Ghana, Burkina Faso."

Uthe yilapho bafike bacula ngokuhlanganyela neqembu laseKenya, elibizwa ngamaMaasai, okungabantu abahlala ehlathini. "Saphinda sabelana inkundla noMamodou Diabate waseBurkina Faso. INigeria beyimelwe yindodana kasaziwayo kwezomculo, uFela Kuti, okunguMade Kuti." UNtombi uthe ikhonsathi yabo yokuqala bayenze eSolomei, lapho bebecula esontweni lamaRoma baze bathola nesidlo seNkosi.

"Ikhonsathi elandelayo beyiseSolomei Monument esentshonalanga yasePerugia. Sabe sesivala ngomcimbi wokugcina endaweni egcina amagugu esizwe sase-Italy."

Uthe bashiye e-Italy ngoLwesine, futhi kulindeleke ukuba batheleke kuleli namhlanje ngoMgqibelo. Amanye amalungu aleli qembu ngoSnegugu Khoza, Pinky Mabaso, Fikile Mhlongo, Nomvula Dlamini, Bhe Shanxi noZukiswa Majozi.

I-Afrika Mamas izohlala inyanga eyodwa bese iqhubekela eRussia, lapho izonandisa khona kwiBRICS Folk Cultural Festival eseRyazan ngoSepthemba 3 kuya kumhla ka-9. Isolezwe lizibonele ngawalo isimemo esithunyelelwe leli qembu yinhloko yalo mcimbi nengumqondisi we-We Stand On That, uVitaly Mironov ngoJanuwari 19, kulo nyaka.

 "Sibuye samenywa kwiKlan Kosmos Festival, lapho sizozungeza amadolobha aseGermany, sidlulele ePoland, Brussels naseGraz Austria."

I-Afrika Mamas yiqembu lesicathamiya elasungulwa ngabesifazane kuphela ngo-1998. Lezi zintokazi seziwuzungezile umhlaba futhi seziqoqe inqwaba yemiklomelo kumazwe ngamazwe.