INHLANGANO ebhekelele ukusebenza kolimi kuleli, iPan South African Language Board (PanSALB), imemezele igama okuyilo elidle ubhedu kubantu baseNingizimu Afrika okubizwa ngeWord of the Year. Ukubuyiselwa komhlaba ngaphandle kwenkokhelo, phecelezi i-Land Expropriation without Compensation, kube yilona gama eliphume phambili nelisetshenziswe ukwedlula wonke kulo nyaka.
Le nhlangano njalo ngonyaka ibheka igama okuyilo elisetshenziswe kakhulu ngabantu bakuleli, okungaba yisemaphephandabeni, kuthelevishini nakwezinye izinkundla zokubhala.
Emagameni abekulawo okugcine kukhethwa kuwona, kubalwa igama elithi Khomishana (obekukhulunywa ngalo uma kukhulunywa ngamaKhomishini aphenya okuthile), kube elithi Thuma mina.
Leli eligcine lidla umhlanganiso kuvele ukuthi lisetshenziswe kwaze kwaba ngaphezu kuka-25 000. UThuma Mina usetshenziswe izikhathi eziwu- 5 228, elekhomishini lona lasetshenziswa izikhawu eziwu-18 690.
Ngokwesitatimende esikhishwe yi-PanSALB, njalo ngonyaka ikomidi elibhekene nokubhekisisa amagama asetshenziswa kakhulu liye lihlale libheke lawo amagama ahlale esezindebeni zabantu uma bebhala. Bakwenza lokhu bebambisene nezinye izinhlaka zabezindaba. Limenyezelwa minyaka yonke ngo-Okthoba 16 okuwusuku olwaziwa ngeDictionary Day. Kubhekwa amagama asebenze kakhulu kusukela ngoJanuwari kuya ku-Okthoba.
Okunye okubhekwayo ngegama eligcina lidla umhlanganiso, wukuthi abantu bayibheke kangakanani incazelo yalo, baphinde balibhala kangakanani ezindabeni noma balisho kangakanani.