I-ANC ayizwa mshini ngabaholi bayo abasolwa ngenkohlakalo nokuwisa iminyango abake basebenza kuyo njengoba ibajube ukuthi babuyele njengamalungu ePhalamende.
NgoLwesithathu umengameli wamaJaji kuleli uChief Justice Mogoeng Mogoeng wamukele uhlu lwamalungu amasha ePhalamende naseziShayamthetho zezifundazwe.
Kubaholi be-ANC ababuyela ePhalamende kubalwa uMnuz Malusi Gigaba, uNkk Faith Muthambi, uNkk Nomvula Mokonyane noNkk Bathabile Dlamini.
Lokhu kushiye imibuzo kwazise laba baholi phambilini amagama abo ake amataniswa nezinsolo zenkohlakalo nokuhluleka ukuphatha iminyango abake bajutshwa kuyo njengongqongqoshe.
Nomvula Mokonyane. Isithombe: Itumeleng English/African News Agency (ANA)
UMokonyane, osendaweni yeshumi ohlwini lwe-ANC, useke waba ungqongqoshe wezokuXhumana, wezeMvelo kanye nowaManzi neNhlanzeko. Usanda kusolwa ngenkohlalalo emnyangweni waManzi neNhlanzeko, okuthiwa uwushiye usesimeni esingesihle sezimali.
Enye yezinkinga lo mnyango osabhekene nazo, isikweletu esibalelwa ku11.2 billion okuthiwa sidalwe ukungaqoqwa kwemali yamanzi ekweletwa omasipala, izinkampani zikahulumeni kanye nezinkampani ezizimele.
UMokonyane igama lakhe liphinde lavela kwikhomishini kaZondo, ephenya ngokulawulwa kombuso yidlanzana ngesikhathi kufakaza owayeyisikhulu sezokukhangisa eBosasa uMnuz Angelo Agrizzi. U-Agrizzi wazisa ikhomishini ukuthi uMokonyane wayegwazelwa ngoR50 000 ngenyanga ukuze avikele inkampani kwabezomthetho.
Bathabile Dlamini. Isithombe: Phando Jikelo/African News Agency(ANA)
Owayengungqongqoshe wezokuThuthukiswa koMphakathi, uNkk Bathabile Dlamini naye akasalanga ngaphandle ohlwini lwe-ANC lwasePhalamende. UDlamini ngaphambi kokhetho ubewuNgqongqoshe wabesiFazane ehhovisini likamengameli ngemuva kokususwa emnyangweni wezokuThuthukiswa koMphakathi ngoFebruwari nyakenye.
NgoSepthemba nyakenye iNkantolo yoMthethosisekelo yamyalela ukuthi akhokhe u-20% wezindleko zokuqulwa kwecala elithinta iSouth African Social Security Agency (Sassa) neFreedom Under Law neBlack Sash Trust.
Lezi zinhlangano zasola uDlamini ngokuxhaphaza imali ngokudlulisela udaba lweCash Paymaster Service eNkantolo yoMthethosisekelo, nokwaholela ekutheni yelulwe inkontileka yeCPS. Ngo-2014 inkantolo ukuthi ukuqokwa kweCPS kwakungekho emthethweni futhi kungafanele. Le nkampani yayiqokwe ngo-2012.
Malusi Gigaba
UMnuz Maluso Gigaba naye akasalanga ngaphandle ohlwini lwe-ANC nakuba esolwa ngokulekelela umndeni wakwaGupta uthole amaphepha obuzwe kuleli, okuyinto ayiphika.
Ngesikhathi esawungqongqoshe wezasekhaya uphinde wabeka imithetho ethikameze imboni yezokuvakasha kuleli odabeni lwabavakasha nezingane.
Odabeni lweFireblade Aviation, inkantolo enkulu eGuateng yathola ukuthi uGigaba wahubhuza amanga ngeminingwano ethize ngesikhathi ephekwa ngemibuzo ePhalamende ngalolu daba. UGigaba ube esezidonsela amanzi ngomsele kuputshuka ivideo yakhe eziphulula isitho sangasese eyamphendula ihlaya kuleli.
Faith Muthambi. Isithombe: GCIS
UNkk Faith Muthambi yena usolwa ngokuphula umthetho ngesikhathi esebenza kwiGovernment Communication and Information System (GCIS). Usolwa ngokuqasha abantu abawu-27 ngokungemthetho kwiGCIS okubalwa kubo abangani bakhe nezihlobo zakhe.
Owayengungqongqoshe womnyango wokuMbiwayo, uMnuz Mosebenzi Zwane, ovame ukungalubhadi ePhelamende uma ebizelwe ukuthi azophendula ngakwenza emnyangweni, naye uyabuyela ePhalamende. Igama likaZwane lilokhu livele njalo uma kudingidwa umndeni wakwaGupta, okubikwa ukuthi nguwo owamsiza ukuthi athole isikhundla sobungqongqoshe.
Mosebenzi Zwane. Isithombe: GCIS
I-ANC ibuyisele laba baholi ePhalamede nakuba omakadebona bayo ngokunjalo namaqembu aphikisayo ethe ingalinge ibabuyise. I-ANC ithole izihlalo eziwu-230 okhethweni nonyaka, isuka kwezingu-249 ngo-2014. Lokhu kusho ukuthi kukhona abaholi bayo abavaleleke ngaphandle ezikhundleni ephalamende.
Ngemuva kokufungiswa njengomengameli wakuleli ngokusemthethweni ngoMeyi 25, umengameli Cyril Ramaphosa kulindeleke ukuthi aqoke ithimba lekhabhinethe yakhe entsha.
Ekhuluma nabezindaba ngoLwesine uMnuz Julius Malema uthe balindele ukuthi uRamaphosa asehlise isibalo songqoqongqoshe, kuphele ngamaPhini abo. Uthe uma ehluleka ukwenza lokhu uzobe eqala impi nabantu bakuleli.