BAMASHELE amahhovisini e-ANC eThekwini ngoLwesihlanu abaseka iMeya yeTheku uNkk Zandile Gumede, engaphansi kwengcindezi ukuthi ishenxe kulesi sikhundla kulandela ubekwa amacala enkohlakalo.
Amaphoyisa abephume ngobuningi bawo ezoqapha isimo kumasha izinkumbi zabantu abazibiza ngabalandeli baGumede ovele eNkantolo yamaCala eMali eThekwini ngemuva kokuzinikela kumaHawks ngoLwesibili. Ungaphandle ngebheyili kaR50 000.
Ezinye zezingqwembe abeziphethwe abebebhikisha bezibhalwe ukuthi ‘iNPA namaHawks basetshenziselwa ukulwa izimpi zepolitiki’.
Abaseka uGumede bathe bafuna umhlangano nosihlalo we-ANC KwaZulu-Natal uMnUZ Sihle Zikalala abamsole ngokuba nolwazi ngokuboshwa kukaGumede, okuyinyo ayichithile.
Thousands of ANC members who are supporters of the embattled Ethekwini mayor Zandile Gumede are marching to ANC Provincial office pic.twitter.com/bzscSALGGz
— Thuba Vilane (@thubao) May 17, 2019
UNkk Zandile Gumede ubekwe icala lokukhwabanisa nenkohlakalo mayelana nethenda kaR208 million yokuqoqwa kukadoti. Uboshwe nabanye ababili.
Abebebhikisha bathe basafuna uGumede aqhubeke nokuba yiMeya noma kunengcindezi evela emaqenjini aphikisayo nakwi-ANCYL abathe kumele ashenxe.
Okhulumela i-ANC uNkk Nomagugu Simelane-Zulu usole umholi weDA kulesi sifundazwe, uMnuz Zwakele Mncwango, ngokuba nesandla ekuqubukeni kwalo mbhikisho. Uthe uMncwango nguye ofake amagama abaholi be-ANC odabeni lukaGumede.
“Ngemuva kokudliwa okhethweni uMncwango uzama ukuvusa igama lakhe kwezepolitiki ngokusabalalisa amanga ngabaholi be-ANC. Siyinhlangano sigculisekile ngokuthi uZikalala usexhumane nabomthetho ukuthola ukuthi ngobani abakhuluma kwinkulumo eqoshiwe esabalelele ku-WhatsApp nakwezinye izinkundla zokuxhumana. Kule nkulumo kunababili besilisa abafaka uZikalala ukuze kube ngathi ubazi ngokuboshwa kweMeya uZandile Gumede,” kusho uSimelane-Zulu osole uMncwango ngokusabalalisa amahlebezi.
Khonamanjalo, ngoLwesihlanu kuvele imibiko yokuthi kusazoboshwa amakhansela abalelwa ku-62 eThekwini asolwa ngokuhlomula ekudliweni kwezimali zethenda kaR200 million yokuqoqa udoti.