ZIGWETSHWE udilikajele izihlobo ezabulala iphoyisa elalisebenza esiteshini samaphoyisa eKing Shaka International Airport eThekwini nyakenye. Labulawa libanjwa inkunzi lisesitobhini sebhasi lilubangise emsebenzini.
UMfanafuthi Ngidi (29) nomshana wakhe uMzwandile Ngidi (23), bagwetshwe yiJaji u-Esther Stein eNkantolo eNkulu yaseThekwini ngokubulala ngesihluku uSergeant Mondli Chiliza (38 ) ngoFebhuwari 28.
UMfanafuthi ugwetshwe iminyaka engu-15 ejele ngecala lokubamba inkunzi ngendluzula, kwathi uMzwandile wagwetshwa udilikajele ngecala lokubulala uChiliza ngesihluku, iminyaka ewu-15 kwelokutholwa nesibhamu sephoyisa,
eminye iminyaka ewu-15 ngokubhadanywa nesibhamu esingekho emthethweni neminyaka emihlanu ngokutholwa nezinhlamvu ezingekho emthethweni.
IJaji lithe baba nonya futhi bakhombisa ukungabi nanembeza ngesikhathi uMzwandile edubula entanyeni nasesifubeni uChiliza maqede bathatha isibhamu sakhe, bamshiya kanjalo.
Baqhubeka behamba bebamba inkunzi besebenzisa leso sibhamu ababesigebenge uChiliza futhi bathatha namaselula amathathu bawadayisa.