Baxube indwangu nemvunulo kuvulwa isiShayamthetho

Khethukuthula Sangweni|Published 2 years ago

BEZISHIYANA ngomshefezo wemvunulo nomswenko izolo ngosuku lokuqala lomcimbi wokuvulwa kwesiShayamthetho saKwaZulu-Natal, e-Oval Cricket Stadium, eMgungundlovu.

Bekuwusuku lokuqala lokuthi iSilo uMisuzulu kaZwelithini sethule inkulumo yaso yokuqala esiShayamthetho, selokhu sangena esihlalweni.

Umcimbi wayizolo uyisendlalelo sowanamuhla lapho kuzokhuluma uNdunankulu uNkk Nomusa Dube-Ncube. Izolo uNdunankulu ubeswenke ngokwesintu efake inhloko, wethule amazwi okubonga emuva kokuthi kukhulume iSilo.

Amalungu esiShayamthetho nezimenywa ezehlukene bezendlalelwe ukhaphethi obomvu, zihamba kuwona zibukisa ngengqephu. Isilo ebesibhekiwe sifike sishaye isudi sase sihenqa ibhande elinqamula emzimbeni elingajwayelekile ukulifaka. UNdlunkulu waso ukaMayisela ubedlubhe ingubo ende ehusha phansi, enobucwebecwebe ebonakala eyiphakamisa egwema ukuyigxoba.

Kuqhamuke nowayengumengameli wezwe uMnuz Jacob Zuma, ezifakele isudi wemukelwa yiPhini likaSomlomo wesiShayamthetho uMnuz Themba Mthembu. UNgqongqoshe wezobuCiko, amaSiko nezemiDlalo uNkk Amanda Bani, ubeswenke ngengubo eveza amahlombe. UNgqongqoshe wezokuBusa ngokuBambisana neziNdaba zoMdabu uNkk Bongi Sithole - Moloi, ubonakale kukhaphethi obomvu eswenke econsa.

UNgqongqoshe wezokuThuthukiswa koMphakathi nezokuvakasha onguSihlalo we-ANC KwaZulu-Natal, uMnuz Siboniso Duma, ubevunule. UDuma ubevule yaphelela waze waphatha nelikhulu ihawu leli. UNobhala we-ANC KwaZulu- Natal, uMnuz Bheki Mtolo, ufike evunule econsa.

Abaholi be-IFP abasalanga ngaphandle uMnuz Velenkosini Hlabisa onguMengameli wayo, noMnuz Blessed Gwala uSihlalo kazwelonke oyilungu lesiShayamthetho bebevunule.

ITHIMBA le-IFP liholwa nguMengameli uMnuz Velenkosini Hlabisa, lingena esiShayamthetho izolo Isithombe : DOCTOR NGCOBO/AFRICAN NEWS AGENCY (ANA)

AMABUTHO kaZulu engena emcimbini wokuvula isiShayamthetho izolo, eMgungundlovu Isithombe : DOCTOR NGCOBO/AFRICAN NEWS AGENCY (ANA)

KWESOKUNXELE nguMnuz Jacob Zuma, oke waba nguMengameli wezwe, noMnuz Themba Mthembu iPhini likaSomlomo weSishayamthetho Isithombe : DOCTOR NGCOBO/AFRICAN NEWS AGENCY (ANA)

UNDUNANKULU kaZulu inkosi Mangosuthu Buthelezi, ifika noNksz Hlengiwe Mavimbela, emcimbi wokuvula isiShayamthetho Isithombe : DOCTOR NGCOBO/AFRICAN NEWS AGENCY (ANA)

IMeya yaseMsunduzi, uMnuz MziTebolla, neMeya yeTheku uMnuz Mxolisi Kaunda, ngesikhathi Isilo sivula isiShayamthetho izolo Isithombe: DOCTOR NGCOBO / ANA

ISILO uMisizulu kaZwelithi sivula isiShayamthetho izolo enkundleni yekhilikithi e-Oval, noNdunankulu wesifundazwe uNkk Nomusa Dube-Ncube Isithombe: DOCTOR NGCOBO/ ANA

USOMLOMO wesiShayamthetho uNksz Nontembeko Boyce (ingubo esawolintshi), nabebehambele ukuvulwa kwesiShayamthetho yiNgonyama izolo Isithombe: DOCTOR NGCOBO/ANA

UNDLUNKULU weSilo uKaMayisela, efika enkundleni yekhilikiti e-Oval kuvulwa isiShayamthetho Isithombe: SITHUNYELWE

UNGQONGQOSHE wezokuThuthukiswa koMnotho, ezokuVakasha nezeMvelo uMnuz Sboniso Duma, eMgungundlovu Isithombe: SITHUNYELWE

UNGQONGQOSHE wezeMpilo KwaZulu-Natal uNksz Nomagugu Simelane Isithombe: SITHUNYELWE