IMPILO ngeke isafana nakuqala kubafundi abahlomule ngoxhaso lwemali eshisiwe kulandela usizo lomsubathi wesifazane owaziwayo.
UNksz Nontuthuko “Nontu” Mgabhi (34) ufeze iphupho lokwakha isikole iKhiphinkunzi Primary, eDukuduku eMtuba ngoxhaso lwenkampani yamaphanta. IHollywood Bets ixhase lesi sikole ngesamba semali engu-R400 000. Lokhu kulekele ekutheni lesi sikole sakhiwe kabusha ngosizo lalo msubathi.
UNksz Mgabhi ugijime imijaho eyisikhombisa, emazweni ayisikhombisa, ezinsukwini eziyisikhombisa ukuqoqa isikhwama sokwakha kabusha lesi sikole. Abemahlanu amagumbi okufundela akhiwe ngosizo lwakhe. Kuphinde kwasizakala nabafundi abaqhamuka emakhaya ahlwempu.
Phakathi kwezinto ezenzelwe abafundi balesi sikole kubalwa nemifaniswano yesikole ethengelwe abafundi ngosizo lwakhe uNksz Mgabhi.
NgoLwesihlanu kuvulwe ngokusemthethweni amagumbi alesi sikole emcimbini obuhanjwelwe izikhulu zoMnyango wezeMfundo nobuholi bendawo nokuyinto ebajabulise kakhulu abafundi bakuelsi sikole. Enye yezimenenja zaseHollywood Bets uMnuz Morgan Shandu uthe bayaziqhenya ngokukwazi ukuba yingxenye yomsebenzi omuhle nobaluleke kangaka emphakathini nakwezemfundo. Uveze ukuthi kubalulekile kubona njengoHollywood Bets ukusiza ekuthuthukiseni abantwana ikakhulukazi emkhakheni wezemfundo.
“Ziningi izikole ezinabantwana abaminyene emagumbini okufundela ngakho ukubona le nkinga isombululeka kungigeza igilo, nokwazi ukuthi ikusasa labantwana lizoqhakaza,” kusho uShandu.