BADUBELE emigwaqweni esenkabeni yedolobha eThekwini, bawusaphaza wagcwala yonke indawo udoti, abasebenzi abaqoqa udoti nabangeneme ngezinqumo zomqashi.
Abasebenzi bathulule imigqomo egcwele udoti, badabula opulastiki okulayishwe kubo udoti izolo.
Ubuyizindimbane udoti emgwaqweni u-Anton Lembede ngasesangweni laseDurban University of Technology, eCity Campus. Kuphazamiseke ukuhamba kwezimoto.
Isenzo sabasebenzi abasophikweni iDurban Solid Waste, silandela isiteleka esingekho emthethweni abasibambe edepho eseSpringfield ngoLwesibili ekuseni.
Ngalolu suku bavale umgwaqo owuthelawayeka uN2 noM4 eningizimu yedolobha ngamaloli, kwasiza amaphoyisa abalusa ababuyisela edepho. Iningi labasebenzi liqhinqe ngaphandle kwedepho lithi ngeke libuyele emsebenzini kuze kube umqashi uguqula izinqumo azithathile.
Kuthiwa abasebenzi behliselwe amahora okusebenza esuka kwayisishiyagalombili aba mahlanu. Lokhu kuvuse ulaka kubasebenzi asebekhala ngokuthi kwehla amaholo ngenxa yesikhathi esincane abasisebenzayo.
Okhulumela uMasipala weTheku, uMnuz Msawakhe Mayisela ugxekile isenzo sokuchithwa kukadoti ngabasebenzi abayitoho ngaphansi kwe-Expanded Public Works Programme (EPWP).
UMayisela uthe labasebenzi bayayazi imigudu okumele bayilandele uma kukhona abengenelisekile ngakho.
“Siyakugxeka ukungcoliswa kwemigwaqo yedolobha ngodoti futhi siyaxolisa kwizakhamuzi ngokwenzekile. Ubuholi bakha izinhlaka zokuba kuxoxiswane ngokungeneliseki kwabasebenzi, ” kusho uMayisela.
Uthe kulindeleke ukuthi abasebenzi bavele phambi kwekomiti eliqondisa ubgwegwe ngesenzo sabo.