Baphinde baboshwa 'abadle' umhlaba
UMASIPALA waKwaDukuza uthele phansi imijondolo othi yakhiwe ngokungemthetho eTete, izolo kwaboshwa abayisithupha abebakhe ngokungemthetho Isithombe: Sithunyelwe UMASIPALA waKwaDukuza uthele phansi imijondolo othi yakhiwe ngokungemthetho eTete, izolo kwaboshwa abayisithupha abebakhe ngokungemthetho Isithombe: Sithunyelwe
KUNGAKAPHOLI maseko inkantolo ihoxise icala lokungena emhlabeni ngaphandle kwemvume ebelibhekene namalungu omphakathi angu-17 aseTete, KwaDukuza, amalunga alo mphakathi asephinde aboshwa ngecala elifanayo.
Ngenyanga edlule amalungu awu-17 omphakathi wakule ndawo, aphuma ejabula enkantolo yeMantshi yaKwaDukuza, ngemuva kokuhoxiswa kwecala lawo, izolo abayisithupha babo babuye baboshwa ngemuva kokuthi bephinde bakha imijondolo kule ndawo.
UMnuz Khulekani Mkhize osekomitini labakhe kule ndawo, uthe le ndawo bayicela enkosini yaKwaMagwaza yikho bebuyele kuyo bayokwakha ngemuva kokuhoxiswa kwecala kodwa okhulumela uMasipala waKwaDukuza, uMnuz Sipho Mkhize uthe banalo uhla lwabantu abavumelekile ukuhlala kule ndawo, ababoshiwe abekho kulo.
“Njengomasipala sinemigomo elawula izakhiwo ezakhiwe ngokungemthetho. Izolo ithimba likamasipala lifice kunemijondolo eseyakhiwe ngaphandle kwemvume yabanikazi bomhlaba, eminye yawo beyingenalutho ngaphakathi. Ebingenalutho idiliziwe, ebinezimpahla sibophe zona izimpahla ukuze abanikazi bezofika bazochaza ukuthi ubani obanike imvume yokwakha.”
Uthe abantu ababafica kule mijondolo akekho othi wanikezwa imvume yinkosi futhi kunzima ukukuqinisekisa lokho ngoba inkosi isanda kukhothama.
“Okunye okwenza ukuthi kube nzima ukuthi akekho umuntu ophuma emkhandlwini wobukhosi bakwaMagwaza esamnikwa umndeni ohlala emkhandlwini, asazi ukuthi ngobani laba abathi bayazi ukuthi inkosi yasikela abathile iziza ngaphambi kokuthi ishone. Asikwazi ukudedela abantu bakhe bengenayo imvume yabanikazi bomhlaba,” kusho yena.
Okhulumela amaphoyisa kulesi sifundazwe, uLt Col Thulani Zwane, uthe kuboshwe abantu abayisithupha ngecala lokungena emhlabeni ngaphandle kwemvume. Uthe umasipala uyidilizile imijondolo ebeyakhiwe ngokungemthetho kulo mhlaba.
Ababoshiwe uthe kulindeleke ukuthi bavele eNkantolo yeMantshi eMhlali namhlanje.